Mizorama Chanchin Ṭha thlen hmasak ber ni - ni 15.3.1891
(Chanchin Ṭha rawn thlentu hmasa ber - Rev. William Williams)
Mizoten Lal Isua chanchin kan hriat hmasak ber ni chu ni 15.3.1891 Pathianni a ni. Hemi ni hian Rev. William Williams leh a ṭhiante pathum chuan Mizoram chhung Tlawng lui kam Mualvum kai Kutbul lui chhuah an lo thleng a. Chutah chuan Liankunga khua Mualvum mipa naupang rual kum 10-15 vel mi 8, 9 lai an hmu a, an hnenah chuan Chanchin Ṭha an hrilh ta nghal a. Darkar hnih emaw vel lai hlim takin an inkawm a ni. (He mi ni March 15 hi kum tin Chanchin Ṭha thlen ni kan ti ta a ni.)
Mizo naupangte chu Pathian lehkhabu milem engemawzat lai an sem a, hlate an sa a, ang phiauin an ngaithla a ni. Ni 20.3.1891 Zirtawpni-in sakawrin Aizawl an lut a, ni 17.4.1891 ah Aizawl an chhuahsan leh ta a ni. Aizawla an cham chhungin Mizote hnenah Pathian thu an sawi ṭhin a ni.
Mizoram Missionary hmasaten Mizoram an rawn thlen hmasak dan indawt chu hetiang hi a ni:-
(i) Rev. William Williams - March 15, 1891 Pathianni-ah Kutbul lui chhuahah Mizote hnenah Pathian thu a hrilh - (He ni hi Mizoten Lal Isua chanchin Missionary-te hnen aṭanga kan hriat hmasak ber ni a ni). March 16, 1891 ah Changsil an thleng a, ni hnih an cham. Ke-in Sairang an pan a, March 20, 1891 ah sakawr chunga chuangin Aizawl an lut.
(ii). Rev. F.W. Savidge leh Rev. J.H. Lorrain te chuan January 11, 1894 ah Sairang an rawn thleng (He ni hi Misssionary Day kan ti ta a ni) January 16, 1894 ah Aizawl an lut a ni.
(ii) Rev. D.E. Jones chuan August 30, 1897 ah Changsil a thleng a, Sairang nena an inkarah Pu Buanga nen an intawk a, Sairangah an riak a, August 31, 1897 ah Aizawl an thleng.
Mizoten Chanchin Ṭha kan dawn avang leh chu Chanchin Ṭha chu kan lo pawm a, Lal Isua chu kan lo rin tak avangin kan nihlawh em em a, kan lo changkan phah em em bawk. Chuvangin, “Aw, Pathian, nang man Chanchin Ṭha min pe, lawmthu kan hrilh a che” ti zel tur kan ni. Chutih lai chuan Lal Isuan a ngaih pawimawh ber “Chanchin Ṭha puandarh hna” hi Kohhranho leh Pawlho leh mimal tinten hna pui berah i neih zel ang u.
- Sanga Ralte, Luangmual Vtg., Aizawl