Sadio Mane-a'n Liverpool chhuahsan a duh

Champions League final-ah Real Madrid an ngam lo zo chauh a, Liverpool-in chanchin hriat nuam lo tak hriat tur an nei - an player chhuanvawr Sadio Mane chuan Reds-a contract thar ziah ai chuan chhuah a duh zawk!

Senegalese forward hian, "Cham-pions League final zawhah engkim ka tichiang ang," tiin a hma hun chungchang a lo sawi tawh a, he thu buatsaih laia a thar ber chu a chhuah duh thu a ni.

Football journalist lar, transfer chungchang a sawi tawh thleng dik lo la awm meuh lo Fabrizio Romano chuan, "Tun nipuia chhuak turin Mane hi a inpeih tawh a ni," a ti a, Reds ṭantu tan rimawi a ni lo.

Chona thar
Romano sawi dawnin Mane hian chona thar hmachhawn a duh tawh a, Anfield-a kum ruk hun a hman chu a ṭha tawk tawhah a ngai - he hmunah hian nomawi chawi theih zawng zawng a chawi kim.

Fabrizio Romano chuan, "Reds tan kum duhawm tak tak a hman hnuah chona thar hmachhawn a duh a, club hnenah chhuah a duh thu hi a hrilh vat ang," a ti a, a club pan tur an inrinsiak.

Mane hi German champion Bayern Munich chuan an hnaih ber nia sawi a ni a, hetihlai hian Real Madrid leh Barcelona hming pawh lam rik a ni ve bawk. Mane hian June 2023 thleng Reds-ah contract a nei a, a contract hman zawh a tum lo.

A tlawm hret
Bayern hian pound maktaduai 25.5 vela Mane hi thlem luh theih an inbeisei nia sawi a ni a, mahse, Liverpool thuneitu, a hming tarlan loh chuan heti zat leka Reds-in an kaltir loh tur thu a sawi.

Mane hian Liverpool-ah thla 12 dang cham turin contract a la nei a, Merseyside club hian an chhiarna man zat anga an hralh theih dawn loh ai chuan kum khat dang kawl a, season tawpa a thlawna chhuahtir an pawi ti lo zawk nia sawi a ni!

Reds chuan Mane hi an hralh dawn a nih chuan pound maktaduai 42.5 tala hralh an duh a, hetiang zat hian hralh pawh ni se tun laia player man zat ngaihtuahin amah thlakna tur class sang tak chu a hralhna suma lakluh a harsa ang.

Liverpool buaina
Chhuak tur anga sawi thawm awm reng Mohamed Salah-a'n Anfield-a a cham tur thu a sawi a, rin loh takin Mane zawkin chhuah a tum - Senegal international a chhuah chuan tlarhma player zawngin Liverpool hi an chet vat a ṭul ang.

Reds hian striker Divock Origi chu tun season-ah a contract a zawh tawh avangin a thlawnin an chhuahtir a, AC Milan a zawm ngei rin a ni. Tun season match 24 a khelha goal 10 leh assist vawi khat neitu Takumi Minamino pawh chhuak thei dinhmunah a ding.

Minamino hi Liverpool chuan chhuahtir an phal nia sawi a ni a, Japanese forward hi Inter Milan leh Leeds United nen sawizawm mek a ni - Inter hian pound maktaduai 17 sen an inhuam.

A harsa dawn
Liverpool-in Mane an chân a, Origi bakah Minamino a chhuah bawk chuan tlarhma player pathum ngawt an chhuak dawn tihna a ni a, Reds boss Jurgen Klopp tan anni thlak zo forward pathum zawn a harsa ang.

Reds hian Fulham aṭangin winger Fábio Carvalho an lalut tawh a, mahse, kum 19 mi forward hi rinrawla lo neih nghal ngawt atan chuan a kum a la nau deuh niin a lang bawk.

Liverpool hian Mane chhuak ta se, tlarhmaah Salah, Roberto Firmino, Diogo Jota leh Luis Diaz an la nei a, Firmino hi a chhuah mai rinna lian mah se amah ber hian "He club-a cham zel hi ka duh," tiin Real Madrid an ngam loh hma khan a sawi.

Mane aiah?
Liverpool hian season tawp hma khan Son Heung-min chu Tottenham Hotspur aṭanga lakluh an rilruk nia sawi a ni a, mahse, Spurs-in Champions League an khelh dawn avangin South Korean forward lakluh tum hi an ṭhulh nia sawi a ni.

Son hi coach Antonio Conte hnuaiah a tlatlum a, kum 29 mi forward lalut tur chuan suma chaldelh a ngai viau ang - Spurs tana a khelhpui Harry Kane pawh an sawi ri a, Lewandowski hming an sawi ri bawk.

Bayern Munich striker Lewandowski hian Barcelona pan a duh nia sawi a ni a, mahse, Lewy hi Jurgen Klopp-a chher hriam a ni tih theihnghilh suh.

Sulhnu ropui
Kum 30 mi Mane hian June, 2016 khan Reds hi Southampton aṭangin a zawm a, hetihlaia a man zat hi pound maktaduai 34 a ni a, kum nga chhung atan contract a ziak.

Merseyside club tan hian inelna hrang hrangah match 269 khelin goal 120 a khung a, assist vawi 48 a nei - PFA Team of the Year-ah vawi thum a lang a, PFA Fans' Player of the Year-ah vawi khat thlan a ni a, 2018-19 season khan goal 22 khungin Premier League top scorer a ni.

Mane hian Liverpool-a a cham chhungin Premier League, FA Cup, League Cup, Champions League, UEFA Super Cup leh FIFA Club World Cup nomawi a chawi hman.