AC Milan hun a thleng ve ta

Team ropui leh sulhnu nei ṭha, mahse tun hnaia hlawhtling hleithei lo AC Milan hun a inherchhuak ve leh ta. Milan hian kum 11 hnuah Serie A nomawi an chawi ve leh ta a, an lawmna chu tuifinriat angin a fawn liam vel ngei ang.

Stefano Pioli enkawl AC Milan hian Sassuolo 3-0 in an hneh a, league match 38 aṭanga point 86 hmuin an chungnung ber. An hmelma leh elpui Inter Milan aiin point hnihin an sang zawk, champion nomawi an chhuhsak nghal bawk.

Italian football inelna sang berah Milan hi vawi 19 an champion tling ta chiah - Inter Milan nen an champion hnem lam a inang. Record nei ṭha ber chu Juventus an la ni zel; Old Lady hian vawi 36 zet Scudetto hi an la tawh.

Champion Milan
Pathianni zan Serie A match an khelh hmain Milan leh Inter inthlauhna chu point hnih a ni, dar 9:30-ah ve ve match hnuhnung ber an khel. Inter hi San Siro-a inkhel an ni a, Milan erawh khualmualah an feh chhuak thung.

Milan hian striker Olivier Giroud-a goal hnih hmangin hma an hruai fal nghal a, boruak rit lutuk an tawng lo hlauh. Chawlhlawk hmain Franck Kessie chuan a khung belh bawk, half time an hman meuh chuan champion tur a chiang der tawh.

Inter pawhin Joaquin Correa-a goal hnih leh Ivan Perisic-a goal hmangin Sampdoria 3-0 in an hneh. Simone Inzaghi nauten an theihtawpa ṭhain season an khar, amaherawhchu an nomawi kawl lai humhim turin a tawk zo ta lo.

Pioli-a Milan
AC Milan hian Marco Giampaolo thlak nan, October, 2019 khan Stefano Pioli an la. Serie A nomawi an chawi hnuhnung ber aṭanga chhutin manager nghet pakua an neihna a ni hial - a tirah chuan a lakah Milan fans lamin beisei an nei sang lo.

Social media lamah #PioliOut tih a lar nghal a, a tir lamah hna a thawh ṭhat tawk loh avangin amah thlakna tur an be hman hial - mahse season hmasa chawhnu lam aṭang khan a rawn tho chhuak, ban tura ngaih tawh kha an chelh ta zawk.

Rin hlawh lo mah se Italian manager hian zawimuangin team a din a, season hnih leh a chanve a enkawl meuh chuan Serie A champion thei team a nei ta der mai, a tira amah duh lotute ṭawngkam ni loin thiltih hmangin an ka a hupsak chiang hle.

Ibra leh Giroud
Hmanah kha chuan maw - Clarence Seedorf, Filippo Inzaghi, Sinisa Mihajlovic, Vincenzo Montella leh Gennaro Gattuso te an nei a, an champion kha a mak lo. An champion hnuhnung bera player zingah Zlatan Ibrahimovic erawh a la chawl lo!

Ibra hian Milan tan nomawi a chawi leh hma chuan football a chawlhsan loh tur thu a sawi. Tunah chuan kum 40 mi Ibra hi a duh a nih chuan thlamuang takin a chawl thei tawh ang, a hma hun erawh a la sawi chiang thei rih lo thung.

Swede striker ang bawkin Giroud chu player pawimawh a ni. France international striker hi kum 35 mi ni tawh mah se match pawimawh bikah a la che fuh thei hle, khelmual chhung bakah a pawn lama tawnhriat an neih ṭhat chu player naupang zawkten an chhawr ṭangkai.

Milan, Juve leh Inter
AC Milan-in Serie A an champion hnuhnun ber chu 2010-11 season kha a ni a, Massimiliano Allegri kaihhruaina hnuaiah an champion. Milan hian tun season-ah nomawi an chawi leh chauh a, nomawi chawi inkarah season 10 tla mah se Juventus leh Inter Milan te chauh an champion.

Milan champion puitu Massi-miliano Allegri-a'n Juve ṭum nga a champion pui a, season liam taa Inter Milan champion puitu Antonio Conte pawhin Juve ṭum thum a champion pui. Tun ṭuma Milan champion puitu Stefano Pioli erawh 2019–20 season-a Juve champion puitu Maurizio Sarri ang thoin manager a nih hnua Scudetto a chawi hmasak ber a ni.

Player, coaching staff, club leh min thlawptu fans chungah lawmthu ka sawi - anni hian Scudetto hi an phu, kan zavaia hlawhchhuah a ni. Beiseina nung kan neih chu a takin kan tihlawhtling. Serie A champion kan ni hi a tawpna tur a ni lo, ngelnghet taka khelh kan tum chhunzawm tur a ni. Season kha thlir kir ila, inkhel pawimawh leh chak ngei ngei ngaihnaah kan chak thei, kan rilru put hmang a dik. - Stefano Pioli Milan Manager