Mapuia Cricket League Players lilamnaah nuai hnih hmang tling

Mizoram cricket-a sum tamna ber Mapuia Cricket League chu March 4 aṭang khian Suaka Memorial Cricket Ground, Sihmuiah khelh ṭan a ni dawn. March 20 thleng awh tur inelnaa tel tur player lilamna hun hi Thawhlehni zan khan LPS Studio, Zarkawtah neih a ni a, Ramhlun Venglai CC batsman K. Vanlalruata chu MCL chanchina player manto ber ni turin Zarkawt Lords chuan Rs 46,000 zetin an lei chhuak.

Sum ngah ngah hmelṭha

Thawhlehni zana MCL pla­yers lilamnaah hian MCL khel tur chiang tawh Armed Veng CC, Chanmarians CC, Chhinga Veng CC, Kulikawn CC leh Zarkawt Lords CC te an che na hle a, team pangain players lakluh nana sum an sen zat belhkhawm hi Rs 2,13,100 zet niin Zarkawt Lords chu sum inseng huai ber an ni.

MCL nomawi chawi ngei tumin Zarkawt Lords hian pla­yers panga lakluh nan Rs 82,000 zet an seng a, players paruk lakluh nana Rs 21,000 theh chhuak Chanmarians chu players ṭha lakluh nana sum inhmang tlem ber an ni. Armed Veng CC-in squad chhah tak neih an duh tih pholangin lilamna aṭangin players pasarih ngawt an lei a, an sum insen zat chu Rs 45,100 niin tih mai mai an tum lo.

Players manto

Durtlang tlangval, batsman ṭha K.Vanlalruata'n tualchhung cricket-ah a theihna a pholan fo avangin Zarkawt lamin an ngam huai hi a awm lo hran lo a, player manto pahnihna Malsawmdinpuia lakah Armed Veng an inseng huai viau bawk. Armed Veng CC hian Ramhlun Venglai CC lama K. Vanlalruata nena khel dun Malsawmdinpuia hi Rs 21,500 zetin an chhang a ni.

Chhinga Veng lamin 'a tikimtu' nih an tum bik lo tih pholan nan player manto pathumna Lalṭha­kima chu Rs 21,000 in an lei a, Luangmual aṭangin Raj Kumar Thakur chu Rs 15,500 in an lalut bawk. Zarkawt Lords lamin K. Vanlalruata manto takin lei mah se an duhtawk mai lo a, Lalhruaimawia lakluh nan Rs 21,000 an inseng bawk.

Club-in players an lei te:
Armed Veng CC (7)
Malsawmdinpuia Rs 21,500
Paua Zathang Rs 1,800
Vanlalhmuaka Rs 2,300
Bobby Zothansanga Rs 10,000
Lalhlimpuia Rs 6,500
Ranjit Rajak Rs 1,000
Indra Chhetri Rs 2,000
Total Rs. 45,100
Chanmarians (6)
Lalthanzuala Rs 1,000
Zoramthanga Rs 6,000
Lalzuitluanga Rs 4,000
Lalmuanpuia Rs 6,000
Rajiv Jaishi Rs 2,000
Henry Lalsangzuala Rs 2,000
Total Rs. 21,000
Chhinga Veng CC (6)
Sagar Sunar Rs 2,000
Ronnie Lalthanzama Rs 2,000
Raj Kumar Thakur Rs 15,500
Ismael Shaffiulla Rs 1,000
Lalṭhakima Rs 21,000
Jehova Rs 2,400
Total Rs. 43,900
Kulikawn CC (5)
Zasangluaia Rs 1,000
Arbin Shahi Rs 5,000
Lalchhuanliana Rs 9,500
Laldinthara Rs 2,600
Lalrinfela Rs 3,000
Total Rs. 21,100
Zarkawt Lords CC (5)
Lalhruaimawia Rs 21,000
Ngurdingliana Rs 3,000
Vanlalruata Rs 1,000
G. Lalbiakvela Rs 11,000
K. Vanlalruata Rs 46,000
Total Rs 82,000