Valencia an chak ve ta

Covid-19 vanga thla thum zet an chawlh hnua a vawi khat nan Valencia an chak ve ta a, Champions League khelh an la tum ve reng a ni tih pholangin Osasuna chu 2-0 in an hneh. 

Valencia hian La Liga khelh ṭan leh a nih hnua an match hmasa berah Levante chu 1-1 in an inhnehtawkpui a, match hnihnaah 3-0 in Real Madrid an ngam lo zui. 

Match thumnaah erawh Valencia-in tlawm nawn an tum tawh bik lo - Goncalo Guedes leh Rodrigo te chuan minute 35 chhungin goal hnih an khung a, hun tawp thlenga goal dang lut loin 2-0 in an chak. 

Valencia hi table-ah pariatna ni mah se pangana Getafe nena an inthlauhna chu point hnih chauh a ni a, palina Sevilla an phak lohna chu point ruk chauh a ni bawk - top four-a tel an la beisei thei. 

Hetihlai hian La Liga-a inhamtan tum Celta Vigo chuan Alaves chu 6-0 ngawtin an sawp a, minute 27-naa Martin Aguirregabiria hnawhchhuah a nih avangin Alaves tan thawh ngaihna a awm lo. 

Celta tan Rafinha chuan goal hnih a khung a, Jeison Murillo, Iago Aspas (penalty), Nolito (penalty) leh Santi Mina ten goal khat ṭheuh an khung bawk.