JeJe12 Football Academy an hawng

Football zirna JeJe12 Football Academy chu nimin khan Hnathialah Jeje Lalpekhlua pa F. Liankima'n a hawng. Academy hi Mizo footballer zinga thleng sang ber Jeje hming chawia din a ni.

Academy hi Hnahthial DFA-in an thlawp ṭha a, nikum kum tawpa hawn Hnahthial Ground-ah training an nei dawn. Jeje chuan, "Naupang zawkte tana football zirna din hi ka lo suangtuah ṭhin a, Mizo naupangten football an tui si a, inzirna tur ṭha an nei lo. Player naupang zawkten football hmanga eizawnna an neih theih nan rahbi siamsak hi kan tum a ni," tiin Vanglaini a hrilh.

JeJe12 Football Academy hian head coach-ah Tata Trusts Centre of Excellence (CoE) a coach hna thawk ṭhin F. Lalrozama an hmang a, Bawngkawn tlangval hi Jeje nen Pune FC-ah te khel dun tawh ṭhin niin Aizawl FC player hlui Jonathan Lalhriatkima leh Lalchhanhima ten an pui ang.

Academy-ah hian Hnahthial leh a ṭhenawm khuaa naupangte an inziak lut tawh a, tun dinhmunah non residential-a kalpui a nih avangin hmun dang aṭanga kal an la awm lo. Registration fee hi Rs 1,000 a ni a, thla khat fee a tel nghal - thla tin fee hi Rs 500 a ni ang.

Jeje chuan, "India ram hmun dang aṭang pawhin min rawn bia a, hei hian min tiphur hle. Minerva Academy te nen pawh kan inthlunzawm a, academy dang nen pawh indawrna a kal mek. Kei hi kum 17 ka nihin academy pangngaiah ka awm ve ṭan chauh a, naupan lai aṭanga academy-a awmte an danglam ṭhin hle. Ka harsatna tawh ang kha tawk ve lo se tih hi ka duh a, theihtawp chhuahin academy hi kalpui kan tum a ni," tiin a sawi.