English Football League Cup Final luh tum Reds hmaah Saints

"Southampton mikhual turin kan inpeih a, final khelh ngei kan duh avangin team dang ka ngaihtuah hman lo. Ka nauten an theihna zawng zawngin an khel ang a, fan-ten 100%-in min thlawp bawk ang," tiin Jurgen Klopp-a'n a sawi a, zanin dar 1:30 a Southampton mikhual turin Liverpool an inpeih tawh.

EFL Cup semifinal first leg-ah Saints-in an khelmualah 1-0 in hnehna an chang tawh a, zaninah second leg khelh a ni dawn. Liverpool tan Wembley Stadium pan turin chak ngei ngei a ṭul a, Anfield-ah Swansea laka mualpho hlim team hi an inisam ṭha hman ang em tih chu zawhna awm thei a ni.

Puel a zam lo!

Saints-in 1-0 in first leg-ah hnehna chang tawh mah se manager Claude Puel chuan goal venhim ringawt chu an thupui tur a nih loh thu a sawi a, Anfield-ah attacking game an khel dawn! French manager chuan, "Liverpool hi an match hnuhnung bera Swansea hneh lo hlim an ni a, an hliam tawrh aṭanga thawh leh ngei tumin theihtawp an chhuah dawn a ni," tiin Reds hlauhawm thu a sawi.

Kum 55-a upa Puel chuan sawi chhunzawmin, "Tun dinhmunah hian goal khat chauh venghim tura khel chi kan ni lo a, khualmuala goal khung ngei tumin kan nawr ang. Liverpool hi chak tura rinkai zawk chu an ni ngei a, mah se football-ah thil thleng thei lo a awm lo," tiin Anfield-ah EFL Cup final ticket lei theih a inring.

Southampton manager chuan an phur sual a hlauh thu sawi nghalin, "Tunah chuan Wembley leh final kan la mitthla thiang lo a, first leg chiah kan la khel tih hi kan hriatreng a ṭul a ni," tiin a fimkhur hle.

Engkim beiseitu Klopp

Liverpool coach Jurgen Klopp chuan ngaihpawimawh bik a neih loh thu sawiin, "Engmah hi dah hmasak bik ka nei lo. EFL Cup, FA Cup leh Premier League ka ngai pawimawh vek. Kan tana pawimawh ber chu a sang thei ang bera tun season hi khar a ni a, kan hmaa nomawi inchhawp zawng zawng chu hui kan tum vek ang," a ti.

Saints manager Puel-a'n attacking football an khelh tur sawi mah se Klopp-a'n an mikhual team chu defensive game khel tura a ngaih thu sawiin, "Team ṭha tak an ni a, min hmachhawn apiangin tlarhnung lamah an inremkhawm ṭhin. Mahse, chu chu Saints-in min hlau tih pholanna a ni a, min hmachhawn an chak lo tih a chian avangin kan tan chuan a lawmawm a ni," tiin a sawi.

Klopp chuan first leg-a an tlawmnain an nunah nghawng a neih loh thu sawi nghalin, "Si khat kan phur emaw, goal khung loin first leg-ah kan inhnehtawk emawin nghawng keimahniah a nei lo. Kan ṭan dan ngai patin kan khel ang," a ti a, chak a tum hle.

Hendo a chiang lo?

Liverpool tan captain Jordan Henderson chu khelmual chhunga a inlan loh reng hnuah Manchester United leh Swansea lakah inkhel bul ṭantir a ni a, Klopp chuan a player pawimawh chuan hliam nei chunga a khelh luih thu a sawi!

Klopp chuan, "Hendo hian a hliamah na a la nei zeuh zeuh a, mah se buaina nei loa Saints a hmachhawn theih ka beisei," tiin a sawi a, dam chiang lo chungin English midfielder chhar luih a tum niin a lang.

German coach hian African Cup of Nations khelh vangin Sadio Mane a chhawr thei rih lo a, Reds players dang erawh chhawr theih turin an awm thung. Inelna match hnuhnung paruka vawi khat chiah chak hmel an hmuh hnuah Reds-in insiamṭhat tumin ṭan an la a, Saints-in milian mutthlu an chhaih kawlh dawn nge Liverpool chetsual lai an nangching dawn tih chu zaninah a chiang ang.

Saints an buai

Southampton-in an captain Jose Fonte chu Premier League-a an elpui West Ham hnenah an hralh a, Portugal international awm loh hnua captain Steven Davis leh Virgil van Dijk te hliam dinhmun a chian loh avangin Saints-in captain tur pawh an la thlang thei lo - Reds lenchilh dawna player pawimawh pahnih inhliam hi Saints tan chuan a luhai thlak khawp ang.

Mahse, Puel chuan a eng zawnga hma lam thlirin, "Ryan Bertrand, Maya Yoshida leh James Ward-Prowse pawh ka la nei a, player hrang hrang te hian team tana thil danglam thlen turin mahni zawnah ṭhatna an nei ṭheuh a ni," tiin a naute a ringtawk hle.

Saints-in an match hnu­hnung parukah vawi khat an khingpui an inhnehtawkpui tih loh chu hnehna an chang vek thei a, an league match hnuhnung berah Leicester City chu 3-0 in an hneh bawk. Southampton khelh ṭhat vanglai taka mikhual hi Anfield pawh ni se thil châkawm a ni lo!