Bayern leh Dortmund tan Lewy leh Haaland

Bundesliga-ah Bayern Munich an chak chhunzawm zel a, Inrinni zan khan Bavarians tan Robert Lewandowski-a'n goal hnih khungin Freiburg 3-1 in an sawp. Inkhel dangah Borussia Dortmund pawhin pahnihna nemnghet turin RB Leipzig 2-0 in an hneh a, Erling Braut Haaland-a'n goal hnih a khung.

Allianz Arena-ah Hansi Flick-a'n team ṭha ber a khelh tir lo a, goal khung tam ber Robert Lewandowski leh assist ngah ber Thomas  Muller-te erawh an inlan. Bavarians tan Joshua Kimmich-a'n minute 15-naah goal hmahruai a khung a, Lewandowski-a'n minute 24 leh 37-naah goal hnih a khung. Polish striker goal khung inkarah hian Lucas Holer-a'n Freiburg tan a khung a, second half-ah goal dang lut loin 3-1 in inkhel a tawp.

Freiburg khel ṭha ve viau mah se team ṭha zawk Bayern-in chak an phu a, Lewandowski telna team an danglam. Lewy hian league-ah goal 33 a khung tawh a, Bundesliga-ah season khat chhunga German ni lo goal khung tam ber record a siam. Arsenal forward Pierre-Emerick Aubameyang chuan 2016-17 season khan Dortmund tan goal 31 a khung a, he record hi Bayern striker hian a khum ta a ni.

Bundesliga record kawltu erawh German mi hrang Gerd Muller a ni a, Bayern legend hian season khatah goal 35 aia tam khung ṭum hi vawi thum 40 (1971-72), 38 (1969-70) leh 36 (1972-73) ngawt a nei. Lewy hian Cologne forward Dieter Muller-a record goal 34  (1976-77) a la pha lo bawk.

Chutihrualin Lewandowski hian tluk lo nei mah se a goal khung theihzia hi sawi nep theih a ni lo. Tun season hian inelna hrang hrangah goal 48 a khung tawh a; Bundesliga match khat, DFB Pokal final leh Champions League te khelh tur a la awm avangin tun hmaa a la tih ngai loh season khata goal 50 khung hi a theih ngei a rinawm ta hle.

January aṭangin Bundesliga-in Erling Braut Haaland an hmelhriat ṭan a, Norwegian striker hian bul a ṭan fuh kha a chhunzawm zel avangin a ṭha tak tak tih hi football mi thiamte ngaihdan a ni tawh. Borussia Dortmund-in Champions League khelh tum RB Leipzig chu an mual Red Bull Arena-ah an luhchhuah a, Haaland-a'n goal hnih a khung.

RB Leipzig tan hian Chelsea zawm tur Timo Werner chuan Red Bull Arena-a a match hnuhnung ber a khel a, German forward Werner hian inkhelh hma hian thawm nei ring viau mah se inkhelh banah erawh Haaland chanchin a langsar ta ber. Norwegian striker hian inkhelh ṭantirhah chance ṭha bik a hlah a, a chanve vawi hnihna erawh a hlah nawn lo. 

Minute 30-naah Gio Reyna pass fing tak chu Erling Haaland hian goal-ah a chantir a, second half ṭantirah Norwegian striker hian woodwork a pet per leh a, vanneih ṭum chu ni se hattrick siam thei a ni. Injury time-ah Haaland hi striker awmna tur takah a awm leh a, dinglam aṭanga Julian Brandt-a cross chu a tlawh goal.

Haaland hian January thla khan RB Salzburg aṭangin Dortmund hi a zawm a, Bundesliga-ah goal 13 khung tawhin minute 75 danah goal a khung. Norwegian striker chuan, "Reyna hi 'American duthusam' tiin ka lo sawi tawh a, kum 17 mi a ni a, khelmuala a hnathawh hi a mak zawk. Kei aiin hmabak a nei êng zawk," tiin goal hmahruai siamsaktu Gio Reyna a fak hle.