Santosh Trophy champion Kerala

India rama state leh state, football hmanga an inelna sang ber Santosh Trophy chu khelh zawh a ni leh ta a, Kerala chuan penalty-ah 5-4 a West Bengal hnehin champion nomawi an chawi.

Manjeri Payyanad Stadium, Malappuram, Kerala-a final inkhel hmuhnawmah team pahnihin minute 90 chhung goal an khung thei lo a, extra time khelh zui a ni.

West Bengal tan Dilip Orawn chuan minute 97-naah chakna goal-a khungah a inngai hman a, mahse, Bibin Ajayan chuan Kerala tan si phurh a sut a, goal dang a lut zui lo.

Penalty hmangin chak zawk zawn a ni a, Kerala lamin an khung vek laiin, West Bengal tan Sajal Bag chuan a khung thei lo a, penalty-ah 5-4 in Kerala an chak.

Inkhel chu
Kerala-ah an state team ṭan turin mipui 26,857 an pungkhawm a, mahse, West Bengal chu hlauhawm hmasa zawk an ni. Nabi Hussain Khan chuan minute ngana lekah uiawm takin a hlah nghal.

Minute 23-naah Mahitosh Roy-a'n chance duhawm a hlah zui ve leh - inelna thlengtu tan Viknesh M leh centre back Sanju G te chuan uiawm takin chance an hlah zui a, Bengal tana Mahitosh-a chance Kerala keeper Midhun V-a'n a dansak pawh uiawm a tling.

Second half-ah Kerala an insiamṭha - Jijo Joseph, Jesin Tk. Thonikkara leh Shighil NS ten chance an nei vek a, an chhawr lo. Bengal tan Md. Fardin Ali Molla-a'n hun duhawm a hlah ve bawk.

Minute 90 chhung goal a luh loh avangin extra time khelh zui a ni a, West Bengal tan Dilip Orawn chuan minute 97-naah a khung ta nge nge. Mahse, Bibin Ajayan chuan Kerala tan minute 116-naah si phurh a sut a, penalty hmangin Kerala an chak zui.

A vawi sarihna
Gokulam Kerala coach hlui Bino George enkawl Kerala tan Santosh Trophy-a vawi sarih an champion-na chiah a ni a, kum 2018 hnua an champion lehna hmasa ber a ni.

West Bengal tan chuan Kerala hi an hnawksak hle - South Indian football team-in nomawi an chawi hnuhnun bera an hneh pawh hi West Bengal tho an ni a, Salt Lake Stadium, Kolkata-ah penalty shootout hmang bawkin an hneh tawh.

Kerala hi an champion avangin Santosh Trophy-a champion ngun pathumna an ni nghal a, Punjab (8 titles) leh West Bengal (32) an la phak lo - West Bengal hi final-a vawi 14 an tlawmna chiah a ni bawk!

Khawiah nge Mizoram?
Kum 2014 champion Mizoram chu tun inelnaah hian an tel lo - Mizoram hi North East qualifier-ah Manipur, Nagaland leh Tripura te nen group khatah an awm a, group hmahruaitu an nih chuan final round khel tur an ni.

Mizoram hian match hmasa pahnihah Nagaland leh Tripura an hneh a, match tawp berah Manipur draw tawk mah se inelna thlengtu hi an hneh lo. Chutichung chuan team pahnih hian point ruk ve ve an hmu a, head-to-head en niin Manipur an chungnung ta zawk.

Kum 2014-a an champion hnuah Mizoram hian 2015-ah semifinal an lut a, 2016-ah final round khel mah se group stage-ah an tla a, 2017-ah semifinal lut leh mah se penalty hmangin West Bengal an ngam lo.

Mizoram hian 2018-ah semifinal an khel leh a, 2019-ah an tling lo a, Covid-19 vangin 2020 leh 2021-ah Santosh Trophy khelh a ni lo a, kuminah an inpetkai zo lo thung.