Chanmari hmaa ding tur Electric Veng

Kuriz Collection MFA Futsal League final chu zanin 8:30 hian R. Dengṭhuama Hall, Mualpuiah khelh a ni dawn. Champion lai Chanmari Zothan Futsal Club leh Electric Veng FC te an inkhel ang. Team pahnih hi group stage-ah pakhatna dinhmuh an hauh ve ve a, dream final tiha sawi theih a ni.

Zanin vek hian Division One leh Veteran Football final khelh a ni dawn a, final-a inhmachhawn tur kan hre hman lo.

Chanmari an chungnung
Futsal League hi ṭum hnih neih a ni tawh a, Chanmari Zothan hi an champion ve ve avangin an chungnung an tih theih. Season hmasa berah Chanmari hian final-ah Chhinga Veng 6-5 in an hneh.

Season hnihnaah pawh Chanmari leh Chhinga Veng thoin final an khel a, Chanmariin goal ruk bawk an khung a, 6-4 in hnehna an chang.

Chanmari coach Samuel Lalrinzuala Sailo chuan inelna ṭan hmain a lungthu kim nan champion ngei an tum thu leh chumi tur chuan player pawh an lak ṭhat thu a sawi a, a thusawi thlen dik nan match khat chauh chak a ngai tawh.

Chanmari hi senior player Rochhingpuia, Samuel Laltlanthanga leh H. Lalbiakthanga ten an ho thei a, season 1-a best player David Laltlansanga bakah che rang K. Roluahpuia (K. Mama) leh ball thiam Lalremtluanga (Marema) te an nei bawk.

Samuel-a chuan, "Ka player-te ka ringtawk a, club hruaitute inpekna leh Pathian vang chauha final thleng thei kan ni. A zawna vawi thum champion hi thil ropui a ni a, futsal history-a sulhnu danglam kan hnutchhiah theih nan veng mipui, club support-tu leh futsal ngainatute min ṭawiawm turin kan sawm a ni," tiin Vanglaini a hrilh.

Beisei nei Electric Veng
Chanmari Zothanin final boruak ṭum hnih ngawt an tem tawh laiin Electric Veng erawhin final chu sawi loh, knockout stage pawh an la lut lo.

Chutihrualin season hmasa pahnihah hi chuan Lalluaii Electric Veng FC tihin an tel a, tunah chuan Electric Veng Futsal Club kutah a awm tawh.

Electric Veng manager Lalrinsanga (ST-a) chuan, "Electric Veng hming tawp chuan kan vawi khat telna a ni a, Lalluaii te hian hmun min ken avangin lawmthu sawi nan kan kawrah hian an hming kan la chhu kai a ni," tiin an team awm dan a sawifiah.

ST-a chuan sawi chhunzawmin, "Vengchhung hlangin kan khel a, kan inlungrual hle. Kan naute hi an tha a za a, an che rang a, champion pawh an châk. Chanmari hi champion lai ni mah se champion ngei kan tum a, theihtawp kan chhuah ang," tiin a sawi.

Electric Veng hi Lalhlimpuia (Tat-a) enkawlna hnuaiah an khel a, Mizo football talent nei ṭha zinga sawi phak Tat-a hi khel pah nghalin team tan a la ṭangkai hle. Chutihrualin player naupang zawk Jonathan Lalrawngbawla, Lalrinsanga Khawlhring leh Lalṭhakima te chu team innghahna an ni a, Chanmari tan pawh tawh an khirh ang.