Tlak hlau hmachhawn tur City & Liverpool Chanmari leh Venghnuai

Premier League-a Manchester City leh Liverpool daidantu chu point khat lek a ni a, kartawpah tlak hlau team pahnih an hmachhawn ve ve dawn bawk - a hmuhnawm ang.

Manchester City hian zanin dar 7:30-ah Watford an mikhual dawn a, Pathianni zan dar 9:00-ah Liverpool-in Merseyside derby khel turin Everton an mikhual thung ang.

Table-a 19-na ni mek Watford tan season thara top fl ight league khel turin chak ngei ngei a ṭul tawh a, champion tum City tan tlawm a thiang lo bawk.

Liverpool-in champion turin City chet chhiat chan tel bakah chak an mamawh a, Everton tan him turin chak a ṭul bawk - Reds fan-ten champion a, a kalkawnga Everton pet thlak bawk tluka châk an nei kher lo ang!

Lungmawl lo val!
City boss Pep-a'n Liverpool nen an inhnaihzia a hria a, Spanish manager chuan, "Mi mawl kan ni lo - point kan hloh chuan Liverpool an champion dawn tih kan hria a, kan chak vek chuan kan champion dawn tih playerte pawhin an hria.

"Match hautak min hmuaktute kan hria a, ṭha taka kan khelh zel chuan kan chak vek ang. Chutiang kan ti thei a nih chuan kan lawm ang a, kan ti thei lo a nih erawh chuan Liverpool kan lawmpui a ṭul ang," tiin a lo sawi tawh.

Pep-a'n match zawng zawng chak vek a tum a, mahse, a awlsam dawn lo - City hian  awhlehni zan dar 12:30-ah Champions League semifi nal-ah Real Madrid an mikhual dawn a, Pep tan hei hi ngaihtuah tel a ṭul.

City boss Pep-a'n vawi li a champion tawhna Premier League aiin City la champion lohna Champions League a ngai pawimawh ang tih a hriat a, zaninah player ṭhenkhat a dah ṭhain a rinawm - hei hi Watford coach, tawnhriat nei ṭha Roy Hodgson-a'n chhawr a tum ang.

Merseyside derby
English football-a inkhel boruak 'hot' sawi apiangin Merseyside derby sawi tel a ni ṭhin a, Pathianni zana Reds-in Everton an mikhual tur pawh hi a 'hot' loh ring suh.

Everton-in top 10-ah tal season khar theih beiseiin Rafael Benítez an ban a, Frank Lampard an lalut. Mahse, Lampard hoin tla thei dinhmunah an ding mek. Reds laka an tlawm leh ngat chuan an tan tlak a hlauhthawnawm tawh dawn.

League Cup champion tawh Liverpool-in quadruple an la beisei zel a, City aia an vanneihna chu Champions League semifinal-a an khelh tur a hautak lo zawk - Nilaini zanah Villarreal an hmachhawn dawn.

Jurgen Klopp chuan, "Nomawi pakhat kan chawi tawh a, a lawmawm. Mahse, a bak pathum kan la hmabak - ka player-ten hun duhawm tak an hmang mek a, engkim mai hi êng takin kan thlir vek.