Villarreal-in German champion an pet chhuak

Bayern Munich-in Champions League quarterfinal-ah tum châkawm ber zinga mi Villarreal an chang fuh a, semifinal khelh beiseina sang tak nei mah se Unai Emery hoten an barakhaih. Europa League champion Yellow Submarine hian first leg-ah 1-0 in an hneh a, Allianz Arena-ah 1-1 in an chelh leh bawk. Spanish club-in semifinal an lut a, German champion an tla.

Thawhlehni zan inkhelah hian Bayern Munich tan Robert Lewandowksi-a'n minute 52-naah goal ṭha zet a khung a, inkhel pahnih belhkhawmah 1-1 a ni chiah. Extra time khelh a ṭul ngei dawna a lan laiin substitute Samu Chukwueze chuan minute 88-naah goal pawimawh a khung.

Tumna a awm
Julian Nagelsmann-a'n si phur sain Allianz Arena-ah an khel dawn tih a hria a, defender pathum chauh dah lutin attacking player a dah belh. Manuel Neuer hmaah Benjamin Pavard, Dayot Upamecano leh Lucas Hernandez te chauh an awm.

Tlarhmaah Robert Lewandowski thlawp turin Thomas Muller bakah Jamal Musiala a dah belh a, mual sirah Leroy Sane leh Kingley Coman te awmin midfield-ah Leon Goretzka leh Joshua Kimmich te an inkawp.

German champion-in thawhchhuah ngei an tum tih a lang a, Villarreal manager Unai Emery pawhin semifinal thlen ngei tumin, tum mumal tak a nei. Kartawp inkhelah first leg-a Bavarians hnehtute zinga mi pakhatmah bul a ṭannawn tir lo a, second leg-ah erawh bul an ṭan vek.

Yellow Submarine tana bul ṭantute chu Geronimo Rulli; Juan Foyth, Raul Albiol, Pau Torres, Pervis Estupinan; Giovani Lo Celso, Etienne Capoue, Daniel Parejo, Francis Coquelin; Gerard Moreno leh Arnaut Danjuma te an ni.

Team hotu Emery
Unai Emery-a'n player a thlan danah Champions League semifinal thlen phak a ngai pawimawh tih a lang a, La Liga-ah pasarihna chauh an ni chungin player 11 tawp hahchawlhna hun a pe thei. Julian Nagelsmann erawhin table hnuai lam Augsburg an hmachhawn chungin player ṭha a chawlhtir lo.

Khelmualah Emery-a'n thutlukna huaisen a siam rah a seng a, Allianz Arena-ah Lewandowski awmna Bayern tlarhma an chelh thei. Yellow Submarine hian game plan mumal tak an nei tih a lang a, Bavarians-in attacking player chhawr tam mah se pet goal theihna tur hun ṭha an pe lo.

Villarreal tlarhnungah kum 36 mi Raul Albiol a langsar a, Spanish defender hian a tawnhriat neih ang sawr khawmin Lewy tan a hnawksak hle. Albiol hian Bavarians tlarhma a chelh bakah thiam takin hun a khawhral a, German champion tan buaina tham a tling. Chutihrualin awmze neia team remtu Emery-a'n fak a phu takzet.

Lewy nge nge
Villarreal-in goal an venghim a ni ringawt lo a, first half-ah Gerard Moreno leh Arnaut Danjuma te hmangin goal chance an nei zawk hial. Second half-ah erawh Yellow Submarine hi vawi khat an chesual a, Bavarians-in an hmang ṭangkai nghal.

Minute 52-naah Thomas Muller-a ball pek chu Lewandowski-a'n class takin goal ṭha bik khung nan a hmang a, vawi leh khatah Bayern dinhmun a ṭha ta zawk. German champion-in chak duhin an nawr a, Muller-a'n chance ṭha bik a hlah.

Nagelsmann-a'n chak duhin bench aṭangin Serge Gnabry leh Alphonso Davies te a dah lut a, extra time khelh ngai loa chak ngei an tum. Mahni muala khel an nih bawk avangin an tum a hlawhtlin theih pawh a rinawm hle.

Substitute awmze nei
Dinhmun ṭha loa an din hnuah Unai Emery hote an zam lo a, Spanish manager-in counter attack-a hman theih tur winger tlan chak Chukwueze chu bench aṭangin a dah lut.

Minute 88-naah counter attack hmuhnawm bik pholan a ni a, Bayern ṭantute tan hmuh a hrehawm ang. Midfielder Pajero chuan fing takin Lo Celso a pe a, ani hian Moreno pe lehin Spanish forward cross duhthusam chu Chukwueze-a'n chakna goal khung nan a hmang.

VAR hmangin Chukwueze hi a offside em, tih endik a ni a, Bayern substitute Davies vangin a him a, goal hi pawm a ni. Bayern tan siphurh sut nan hun a tlem tawh a, Villarreal tlarhnung a khawng ṭhat bawk avangin Champions League an mangṭha mai a ṭul ta a ni.

Eng nge an sawi?
Villarreal manager Unai Emery chuan, "Last 16-a Juventus kan hneh avangin inrintawkna nasa tak kan nei a, first leg-ah kan theihna kan pholang tawh. Kan tlarhnung rem dan kha duhthusam a ni," tiin a naute khelh dana a lungawi thu a sawi.

Yellow Submarine hi Giant Killer hming an vuah der tawh. Nikum Europa League final-ah Manchester United an hneh a, tun season-ah Juventus leh Bayern an pet thla. An hmabak chu nizana inkhel Liverpool emaw Benfica emaw a ni ang.

Bayern manager Julian Nagelsmann chuan, "First leg-a kan chak loh khan nghawng lian tak a nei a ni. Spain-ah kan khel ṭha lo a, tun ṭumah erawh kan khel ṭha. Tun hnaia kan khelh ṭhat ber ṭum zawk a ni," tiin chak lo mah se an khelh danah a lungawi thu a sawi.

Bayern forward Thomas Muller pawhin, "Tun game chauh hi thlir ila, first leg kha tel lo se chuan chiang takin kan tlang ang. Kan chak lo hi pawm thiam a har a, sawi tur pawh ka hre lo," tiin Villarreal an hneh loh chu a tlawm la hle.