Veteran Football champion AMC Ward 9

G.I.G. Motors Veteran Football Tournament-ah AMC Ward 9 an champion. Nimin tlai final hmuhnawm takah Ward 9 leh Ward 4 hun pangngaiah goal awm loin an inhnehtawk a, penalty shootout-ah 5-4 in Ward 9 an vannei.

RG Stadium-a final khelhah hian hun pangngaiah goal lut lo mah se inkhel a nung ṭha hle. Ṭan aṭanga rei loteah Ward 4-in penalty an hmu a, Danny Lalduhawma rawn pen chhuakin keeper Zarzoliana'n a dansak.

Police keeper hlui Zara hi final-ah a che ṭha a, penalty shootout-ah Lalruatkima leh Samson Ramengmawia te penalty pet dansakin a phu angin best goalkeeper-ah an thlang.

Chutihrualin best midfielder-a thlan S. Malsawmtluanga hming lam hmaih a thiang lo a, Mama hi team chakna hnar niin Ward 9 goal nawrna ber a ni.

Ward 9 captain Hrangzuala hming lam hmaih a thiang lo; Police, Aizawl FC leh PWD defender hlui hian tlarhnung aṭangin team a ho ṭha a, best player-ah an thlang.

Kum 59 mi Hrangzuala chuan, "Ka beisei phak bakin inelna hi a hlawhtling. Hri leng karah player-te fitness a ṭha a, hriselna atan a ṭhat bakah inpawh tlan nan a ṭha. Inelna hi buatsaih zel chi a ni a, best player erawh ka beisei loh lam a ni," tiin Vanglaini a hrilh.

Ward 9-ah hian Dawrpui, Saron Veng, Chhinga Veng leh Tuithiang Veng te an awm. Champion team hian Rs 1,00,000 an dawng a, pahnihnain Rs 50,000 an dawng. Best player leh top scorer bakah position hrang hrang goalkeeper, defender, midfielder leh forward-a a che ṭha ber thlan a ni bawk.

Final - Nimin Inkhel Result
AMC Ward 9 0 - 0 AMC Ward 4
Penalty Shootout-ah 5-4 in Ward 9 an chak
Top Scorer : Peter Lalṭhasiama (Goal 6), Ward 9
Best Player : Hrangzuala, Ward 9
Best Goalkeeper : Zarzoliana, Ward 9
Best Defender : Lalnghakliana, Ward 4
Best Midfielder : S. Malsawmtluanga, Ward 9
Best Forward : Lalruatkima Renthlei, Ward 4