Lin Dan leh Lee Chong Wei

Lee Chong Wei chuan a elpui Lin Dan-a'n badminton a chawlhsan thu a puan khan thlahna thu a ziak.

Thutlukna harsa tak siam hun chu

A lo la thleng ang tih kan hria

Puanzar chu ngaihngam takin i pawtthla ta

Inchhuang taka kan inhmachhawnna mualah chuan lal i ni a

Ngawi renga mittui luang karah chuan

I ropuina pawh mangṭha a ni ta

Lionel Messi leh Cristiano Ronaldo, Roger Federer leh Rafael Nadal, LeBron James leh Stephen Curry, Lewis Hamilton leh Sebastian Vettel, Valentino Rossi leh Marc Marquez, Usain Bolt leh Justin Gatlin te hi anmahni muala ṭha chungchuang vek an ni.

A chunga hming tarlante hi a ṭha bik a nih zia inhrilh nawn an ngai lo a, an elpui tura a ṭha bik dang an lo awm leh chiah hian huang khatah inelna thianghlim chu ropui lehzual zawka chawisanin a awm; Lin Dan leh Lee Chong Wei an la awm cheu, mita hmutu ṭhangtharte u in nihlawh e!

Lin Dan ang thoa ropui chu Lee Chong Wei hi a ni a, player pahnih hi an vanglai a inrual avangin badminton inelna hmuhnawm leh ropui an chhawp chhuak ṭhin, vawi 40 an inhmachhawnah Chinese tlangval hian 28-12 in record a nei ṭha zawk.

Malaysian star Lee Chong Wei hian, "Ka khingpui tawhah chuan a harsa ber a ni," tiin Lin Dan chungchang a sawi. Lin pawhin he ṭawngkam tho hi Chong Wei chanchin sawi nan a hmang ve bawk, inel tak ni mah se an inzah tawn hle.

Kum 28 mi chauh a nih laiin Lin kha 'Super Grand Slam' dinhmun a luah tawh, inelna lian leh ngaihhlut pakuaah a champion kim tihna a ni. Lee pawhin 2007-2017 chhung khan Super Series title 47 lain, world number 1 nihna pawh kar 349 chhung a luah, a zawin kar 199 chhung a awm thei.

Lin Dan hi mi thinchhia leh mahni induhtawk ve tak a ni a, a elpui ber Lee pawh hi a ngeih lo tia sawi a awm ṭhin - an hun hmasa lamah pawh inbakkaihna an nei nual, an puitlin hnuah erawh court chhunga entawn tlak tak an ni - Lin-a'n nupui a neih khan Lee pawh hi a hmunah a kal.

World Championship 2013 final-ah an intawng a, Lin-a'n 16–21, 21–13, 20–17 in hnehna a chang. Inkhel a zawh hmain Lee chu hliam vangin a inhnukdawk, inkhelh banah Lin Dan chuan, "Infiamna hi a nunrawng ngawt mai.

"Lee hi ka hmelma a ni a, badminton khawvelah erawh ka ṭhian ṭha ber a ni thung. Ani nen hian hun hlimawm leh ngaihnawm chu kan hmang dun, khingpui hautak leh khirhkhan tak i nih avangin i chungah ka lawm," tiin a sawi. Lee Chong Wei nen an an hun tawn inrual chuan player hriam zawkah a siam.