Villarreal-in German champion an hre lo

El Madrigal-ah German champion Bayern Munich an lenglut a, mualneitu Villarreal-in 1-0 in hnehna an chang. Unai Emery hote an khel ṭha a, Champions League quarterfinal first leg inkhel hmuhnawm takah hian goal tam zawk khung thei an ni. Second leg hi April 12, Thawhlehni zan hian Allianz Arena-ah an khel ang.

Nilaini zan inkhelah hian Villarreal forward Arnaut Danjuma-a'n minute riatnaah goal awmchhun a khung a, Arsenal midfielder hlui Francis Coquelin goal khung erawh offside vangin pawm a ni lo. Julian Nagelsmann-a hote an vannei a, goal khat chauha an chak loh avangin semifinal lut turin beiseina sang tak an nei thei ang.

An eng ṭha
Europa League champion Villarreal-in Bayern lakah beiseina sang tak an nei tih mipui chet dan hmang aṭangin a hriat nghal a, El Madrigal-a inkhel entuten kawr eng leh flag eng nen Yellow Submarine an ṭawiawm a, mikhual tan zamna tham an tling.

Villarreal hian quarterfinal lut turin Juventus an hneh a, Italian club ṭha an mikhual ṭum hian minute khat lekah goal an chhuah. Bayern lakah erawh Yellow Submarine an insiamṭha tih a lang a, minute riatna lekah goal an khung.

Spanish club hian Gerard Moreno leh Giovani Lo Celso te hmangin Bavarians tlarhnung an ṭhiat a, Lo Celso cross chu Dani Parejo-a'n goal-ah petin Danjuma-a'n a khawih kawi hnuah a goal - keeper Manuel Neuer dem theih a ni lo.

Bavarians an insiamrem chak lo a, Villarreal tlarhnung an tibuai thei meuh lo. Raul Albiol leh a ṭhianten Bavarians chhuanvawr Robert Lewandowski an dah ṭha. Yellow Submarine midfielder Coquelin cross sual chu mawi deuhin goal-ah a lut a, Neuer-a'n a en liam. Amaherawhchu VAR hmanga en nawn hnuah Coquelin hi a offside.

Second half-ah Bayern insiamṭha hret mah se goal chance ngah zawk erawh Villarreal tho an ni. Moreno-a'n goal ban a pet per bakah goal ruakah a khung lo. Spanish forward hian Neuer-a pass sual chu mual laiah chang fuhin goal-ah a pet nghal a, keeper awm lo mah se goal pawnah chiah a kal. Villarreal-in chak an phu a, goal khat chiaha an chak erawh an ui khawp ang.

Emery vs Nagelsmann
Bayern leh Villarreal te inkhel hi coach ṭha inbeihnaah a ngaih theih a, Europa League-a tawnhriat nei ṭha chungchuang Unai Emery hmaah kum 34 mi Julian Nagelsmann fiahin a awm a, German manager hian a paltlang zo lo.

Emery hian rinlawk ang ngeiin tlarhnungah defender pali rawn dahin midfield-a awm player palite nen an inthlawp ṭha a, goal an venghim satliah lo - an goal bawh a na tel. First leg bikah Nagelsmann-a'n kawng tinrengin Spanish manager hi a pha lo.

German manager hian starting eleven a thlang sualah a ngaih theih a, Leon Goretzka aiah Jamal Musiala a thlang chu a ti fuh lo. Musiala a luh avangin Kimmich-a'n tlarhma lam a thlawp ṭhat loh phahah a ngaih theih a, second leg-ah chuan Goretzka-a'n bul a ṭan ngei a rinawm.

Leroy Sane aiah Serge Gnabry-a'n bul a ṭan bawk. Gnabry hi ke dinglam hmang niin Sane hi ke veilama pet a ni a, Gnabry hian khelh dan hran neiin Manchester City winger hlui hmunruak hnawh khat tura vei lama a awm avangin a theihna angin a khel loah a ngaih theih.

Khawvel striker ṭha ber zinga mi Lewandowski-a'n ṭum dang a pha lo a, game plan ṭhat tawk loh vangah a ngaih theih. Polish striker hi ball la tura a tlan letin defender-ten ball an vawrh a, Villarreal defence zawna a awm lahin ball-in a thleng pha lo. Lewy hian ṭum dang ang thoin a ṭhiante tan ṭha deuha 'flick' sak chang te chu nei mah se hmun pawimawhah ball a chang thei lo. Bayern an khel ṭha lo a, semifinal thleng turin insiamṭhat an mamawh hle.

Ka team-te hian eng team pawh an el tawk thei zel. Team ṭha zawk lakah ṭha takin kan khel a, semifinal khel thei dinhmunah kan ding. Bayern laka kan khelh dan kha duhthusam a ni.
- Unai Emery, Villarreal manager

Bayern lakah 1-0 in kan chak a, kan khelh dan thlirin hma ka la sawn thei bawk. Chubaka lawmawm chu a awm chuang lo. Unai hi a thluak a ṭha a, amah hi kan ring tawk a, amah hian inrintawkna min pe bawk.
- Arnaut Danjuma, Villarreal goal khungtu

Villarreal kha chak duhin an tuihal a, chu chauh ni loin khawvel team ṭha ber zinga mi an ni. Tlang taka sawi chuan kha aia nasa a chak lo thei kan ni. - Julian Nagelsmann, Bayern manager

1-0 in kan chak lo tih kan pawm a ngai. Kan vanduai ṭum phei chu ni se kha aia tama chak lo thei kha kan ni. Kan khingpuite an ṭha a, chutihrualin chak kan duh a nih chuan second leg atan kan insiamṭhat a ṭul.
- Thomas Müller, Bayern forward