ISL-ah Mizoram Premier League chhuak 16

Indian Super League, season riatna chu khelh zawh a ni leh ta a, Pathianni zan khan Hyderabad chuan penalty-ah 3-1 a Kerala Blasters hnehin champion nomawi an chawi a, he team-ah hian Lalbiakhlua Jongte leh Mark Zothanpuia chu Mizo awm an ni.

Blasters lamah K. Lalṭhathanga'n hmun pawimawh chang phak mah se a team a champion pui zo ta lo a, mahse, Bethlehem Vengthlang tlangval hi ISL player langsar pawl a ni phak.

Tun season ISL-ah Mizoram player 27 ngawtin inelna an hmachhawn a, an zinga player 16 chu Mizoram Premier League-a sulhnu lo nei tawh an ni - Mizoram football tana MPL hnathawh a lang zel.

Chennaiyin defender Jerry Lalrinzuala'n Bethle-hem Vengthlang tan a khel tawh a, Lallianzuala Chhangte-in Lunglei FC tan Mizoram Premier League qualifier a lo khel tawh bawk.

Bethlehem Veng-thlang, Chhinga Veng leh Aizawl FC tan Jamshedpur defender PC Laldinpuia a lo khel tawh a, Men of Steel tana a khelhpui Ricky Lallawmawma hi Aizawl FC, Chanmari leh Zo United tana MPL-a lo inlan tawh a ni.

JFC defender tho Laldinliana Renthlei chu Electric Veng, Chhinga Veng FC leh Aizawl FC tana lo khel tawh a ni a, kum 2018-a Chennaiyin a zawm khan South Indian club hian Chhinga Veng aṭangin a leiin an lei chhuak.

Tun season ISL-a Mizo player langsar bera chhal ngam K. Lalṭhathanga'n Bethlehem Vengthlang leh Aizawl FC tan hming a lo chher tawh a, Mumbai City defender Hmingthanmawia'n AFC tan a lo khel tawh bawk.

NorthEast United fullback Joe Zoherliana'n Aizawl FC tan MPL a lo khel tawh a, Mizo striker tawnhriat nei ṭha Lalkhawpuimawia hi Dinthar FC, Chhinga Veng leh Aizawl FC tana lo khel tawh a ni.

Mizoram football-a hriat hlawh R. Laldanmawia'n Dinthar FC, Chanmari, Chanmari West leh Aizawl FC tan a lo khel tawh a, NorthEast United tana a khelhpui, Kolasib tlangval William Lalnunfela'n Chanmari leh Aizawl FC tan a lo khel tawh bawk.

Highlander forward Rochharzela'n Aizawl FC aṭangin a career a ṭan a, Odisha FC defender Lalruatthara'n Luangmual FC, Chanmari FC leh AFC tan MPL a hmachhawn tawh a, Odisha tana a khelhpui, Kolasib tlangval Paul Ramfangzauva hi Aizawl FC midfielder hlui a ni.

Aizawl FC tan Isak Vanlalruatfela a inlan tawh a, Jerry Mawihmingthanga hi MPL Under-17 best player leh top scorer lo ni tawh a ni a, Odisha forward hi Chanmari FC senior team tan a khel hman bawk.

I hriat ngaih loh Terina
Tun season ISL-ah Mizo pakhat, Mizoram football-ah pawh kan la hmuh tam tawk loh pakhat a rawn inlar nawlh a, a hming chu Lalrinliana Hnamte a ni - East Bengal midfielder hian ISL-a a season hmasa ber a hmang ṭha hle.

Kolkata club-in result nei ṭha lo mah se Terina tan erawh season hmasa ber hman dan hi, a aia duhthlan tur a tam chuang lo - match 17 ngawt khelin goal khat a khung a, hero of the match-ah vawi khat thlan a ni.
MFA Grassroots aṭangin Terina hian bul a ṭan a, football hmanga eizawn tumin theihtawp a chhuah. Mizoram Premier League club Chanmari FC Under-18 tan a khel zui a, Mizo club-in Pune City an thawhpuina zar zoin ISL club ṭhin academy hi a zawm a, I League U18-ah a inlansak.

Pune aṭang hian Chanmari senior team-a khel turin a kir a, amah siam liantu veng club tan MFA Super Cup leh Independence Day Cup a khel hman a, mahse, MPL-ah a inlan hman lo. Mizoram top flight league-a khelh hmain kum 2020 khan Hyderabad FC reserves team a zawm a, September 2021 thleng a cham. Hyderabad hian senior team-ah khel tura contract pek tiam mah se East Bengal an lo lang a, Kolkata club lian sawmna a pawm - thutlukna a siam sual lo tih kan hria.

Terina hian match 17-ah vawi 220 pass a nei a, a passing accuracy hi 70% a ni a, tackle vawi 50 neiin vawi 32 block a nei - tlarhnung puih thleng a ṭangkai tih a statistic enin a chiang.

Joe Zoherliana a her mawi!
Aizawl FC defender hlui Joe Zoherliana'n season hmasa khan Bengaluru FC a zawm a, mahse, Bangalore club tan a inlan miah lo. Tun season-ah NorthEast United a zawm a, season ṭantir lamah hmun chang phak lo mah se season laihawl aṭangin hmun a chang chho ṭan a, match kua inlan sakin vawi khat assist a nei.

Shillong Lajong FC youth system chhuak Joe hian hero of the match chawimawina vawi hnih lai a dawng hial a, Chanmari FC leh Pune City youth team tana khel tawh, Lengpui defender tan season chhinchhiah tlak a ni.

Kelkang tlangval Lalkhawpuimawia'n season hmasa khan NorthEast United a zawm a, mahse, Mapuia tia hriat lar striker hian Highlander tan match khelh a nei lo. Tun season-ah Mapuia'n ISL-a a match hmasa ber a khel a, NorthEast United tan match 12 ngawtah a inlan - Mapuia hian MPL lamah Dinthar FC, Chhinga Veng FC leh Aizawl FC tan a lo khel tawh.

Sialhawk Express a chul lo
Mizoram Premier League legend tia chhal ngam R. Laldanmawia'n kum 2019 khan ISL khel turin Hyderabad a zawm a, mahse, beisei angin khelhna hmun a chang tam tawk lo.

Hyderabad-a a season hmasa berah match nga a khel a, goal a khung lo. Season hmasa phei chuan match hnihah chiah a inlan ve a, chu pawh khelmuala a hun hman zat chu minute 37 chiah a ni! Sialhawk Express hming lem an pek forward hian tun season-ah erawh match 13 lai a rawn khel a, goal li ngawt khungin assist vawi khat a nei nghal zui bawk a ni.

Danmawia tih lohah Mizo player zinga goal khung hnem chu goal thum khungtu Jerry Mawihmingthanga a ni a, Chanmari tlangval hian match 19 a khelh aṭangin assist vawi hneih a nei tel bawk.

MPL best defender - ISL league winner
Mizoram Premier League club Bethlehem Vengthlang aṭanga bul ṭan PC Laldinpuia'n tun season-ah Jamshedpur a zawm a, ISL-a a season hmasa berah match ruk a khel nghal thei - season hmasa ber atan chuan a chhe lo.

Dinpuia hian, "Season hmasa bera hun hman dan atan chuan a chhe lo," tiin Men of Steel-a a hun neih zatah a lawm tawk a, season tharah hmun a chang tam sawt a nih pawhin mak ti suh. Samthang tlangval Dinpuia hian BVT a chhuahsan hnuah 2018-19 season kha Chhinga Veng tan a khel a, MPL best defender-ah thlan a ni. Season hmasa kha Aizawl FC tan a khel a, I League match 14-ah inlan vekin season ṭan dawn khan Jamshedpur hi a zawm.

FC Goa tan Lalhma-ngaihsanga'n tun season-ah ISL-a a match hmasa ber a khel bawk a, Papuia tia hriat lar defender hian match hnih a khel hman - 2020-21 season khan Goan club hi a zawm a, reserve team tan I League second division a khel a, tun season-ah senior team tan a inlan.

Aw hliam...nang vangin maw!
Mizo player zinga hmabak nei êng ber pawl Isak Vanlalruatfela'n season hmasa khan Odisha FC a zawm a, ISL-a a season hmasa berah match hnih lek a khel - khelmuala a hun hman rei zawng chu minute 28 chiah a ni!
Tun season-ah beiseina sang zawk nen Isak-a'n bul a ṭan a, Odisha tan match nga khelin goal khat a khung - mahse, vanneihnain Isak-a lam a ṭang lo.

Ruantlanga piang, Thingsulthliaha seilian forward hi goal a khung hnu lawkah a inhliam a, hliam vanga khel chhunzawwm thei loin Mizoram lamah a lo haw. Mizo player zingah NorthEast United midfielder Emanuel Lalchhanchhuaha chuan training-naah a khupah hliam a tuar a, a hliam hi zai niin season tluanin a inlan thei lo - a tan chuan season theihnghilh tlak a ni.

January 14 khan FC Goa leh NorthEast United an inkhel a, Highlander tana bul ṭan Rochharzela chu a dar hliam vangin lakchhuah a ngai - a inlan leh tawh lo. Aizawl FC forward hlui Chhara hian a inhliam hmain match 11 a khel hman a, goal khat a khung - khelmuala hun a hman chhung hi minute 408 a ni. Jamshedpur defender Dinliana'n hliam vangin match khat a khel lo bawk a, Mizo player dang zingah hliam vanga tun season-a talbuai an awm lo.

Vawi hnih hero of the match Lianzuala
Tun season Indian Super League-ah match 115 a awm a, inkhelh apiangin hero of the match award semchhuah ziah a ni - Mizoram player-te pawhin he award hi vawi sawm an dawng a, dawng nawn pawh an awm!
Mizoram player zingah Lallianzuala Chhangte chu hero of the match atana thlan hmasak ber a ni a, Lunglei tlangval hian vawi hnih a dawng - mahse, season lai hawlah club khelhna a thlak a, Chennaiyin leh Mumbai City tan he award hi a dawng ve ve a ni.

Blasters midfielder K. Lalṭhathanga chuan hero of the match chawimawina hi vawi hnih a dawng bawk a, beisei anga season hmang lo NorthEast United tan Joe Zoherliana a vul a, hero of the match-ah vawi hnih tho thlan a ni.

Anni pathum bakah hian Mumbai City midfielder rinrawl Laleng-mawia (Apuia), East Bengal rawlthar duhawm Lalrinliana Hnamte, Odisha FC captain Jerry Mawihmingthanga leh Jamshedpur full back Ricky Lallawmawma te chuan award hi vawi khat ṭheuh an dawng bawk. Zohnahthlak player zingah Sebastian Thangmuansang chuan hero of the match award hi vawi khat a dawng ve bawk a, Churachandpur, Manipur tlangval a ni.

Ricky & Dinliana - Jamshedpur innghahna
Premier League-in khawvela fullback inkawp fuh ber pawl Trent Alexander-Arnold leh Andrew Robertson an nei a, Indian Super League chuan Ricky Lallawmawma leh Laldinliana Renthlei an nei!

Indian Super League-a league round-ah match 20 a awm a, league round hmahruaitu Jamshedpur tan Ricky leh Dinliana hian match zawng zawng an khel vek! Ricky hian ISL semifinal match hnih an khelhah pawh bul a ṭan ve ve a, tun season ISL-a match an khelh zawng zawngah bul a ṭan vek tihna a ni.

Dinliana erawh an league match hnuhnung berah a inhliam a, semifinal hmasa zawkah bul a ṭan lo. Armed Veng South tlangval hi semifinal second leg-ah hliam tenau nei chungin a inlan a, first half-ah lakchhuah nghal a ni.

Chhinga Veng FC defender hlui hi ISL-a a khelh ṭhat em avangin India squad-ah pawh koh a ni a, mahse, a hliam vang hian Blue Tigers camp hi a zawm thei lo. Dinliana hian ISL-a match 22 an khelhah match 21 a khel a, assist vawi hnih a nei - Bolton Wanderers Owen Coyle-a duhsakna a chang a, season hmasa pawh khan Scottish coach hnuaiah hian match 15 ngawt a lo khel tawh.

Jamshedpur hian league round-ah point 43 hmu chungin season an khar a, heti zat point hmu thei hi ISL-ah an la awm ngai lo - goal 42 ngawt khungin league round-a khung hnem dawttu an ni a, goal 21 lek an chhuah.

Men of Steel-in goal 21 an chhuah hi league round-a chhuah tlem ber an ni a, hei hian JFC tana Ricky leh Dinliana ṭangkaizia a hrilhfiah - Ricky hian a contract a hmang zo tawh a, a club zawm turah thutlukna a la siam fel lo.