ISL final a 'hot' dawn - ticket an hralh zo tawh!

India rama football thiam ber club kan hre dawn ta - Pathianni zan dar 7:30-ah Hyderabad leh Kerala Blasters ten ISL final an khel dawn a, Indian champion nih an inchuh dawn.

Hyderabad-in ISL-a sum hmang hnem bera chhal ngam leh team ṭha, ATK Mohun Bagan chu semifinal pahnih inkhel belhkhawmah 3-2 in an hneh a, he team hi an ṭha tawk tih hriat a ṭha.

Tun season ISL-ah Jamshedpur FC tluka team hmuhnawm an tam lo a, season an hmang ṭha takzet - league round-ah hmahruaitu an ni a, goal khung hnem ber dawt an ni a, goal chhuah tlem ber an ni bawk.

Mahse, he team ṭha tak hi Kerala Blasters chuan semifinal aṭangin an lo pet chhuak a, South Indian club hian champion nomawi lo chu an mitthla tawh lo.

Goal khung thiam
League round-ah Hyderabad aia goal khung hnem an awm lo a, goal 43 ngawt an khung - hei ringawt pawh hian tlarhma an neih ṭhatzia a hrilhfiah a, final-a anni hmachhawn hi a châkawm lo ang.

Bartholomew Ogbeche bawk hi Hyderabad tan a ṭangkai leh dawn. Nigerian striker hian match 19-ah goal 18 a khung a, assist vawi khat a nei - Paris Saint-Germain tan meuh pawha lo khel tawh a ni a, a chhe thei lo.

Blasters midfielder K. Lalṭhathanga chuan, "Ogbeche hi NorthEast United-ah ka lo khelhpui tawh a, ka hre chiang. Box chhungah a hlauhawm em em a, tharum a ngah a, half chance pawh goal-a chantir thei a ni. Jeje Lalpekhlua nen hian an khelh dan a inang hle," a ti.

Kum 24 mi Javier Siverio hian goal sarih khungin assist vawi khat a nei tawh a, Joel Chianese hi goal li leh assist vawi thum nei tawh a ni bawk - Hyderabad tlarhma hi ven uluk an ngai dawn.

Team inanna
Pathianni zana final khel tur team pahnih hian inanna an nei a, Indian player ṭhangduang kawl hnem ve ve an ni - Hyderabad hian midfielder Nikhil Poojary (kum 26), goal hnih leh assist vawi thum nei tawh defender Akash Mishra (20), vawi 13 assist nei tawh Asish Rai (23) leh defender Chinglensana Singh (25) te an nei.

Kum 32 mi keeper Laxmikant Kattimani hi lam hmaih a thiang lo a, Hyderabad-in final an luh theih chhan lian tak a ni. Brazilian midfielder Joao Victor pawh Blasters tana buaina thlen turin a ṭha tawk.

Blasters-in goalkeeper ṭhangduang Prabhsukhan Gill (kum 21), season duhawm tak hmangtu defender Ruivah Hormipam (21), midfielder Jeakson Singh (20), Puitea (23) leh goal ruk khung tawhtu Sahal Abdul Samad an nei.

Puitea chuan, "Tlarhmaa kan player pathum an ṭha. Khelmualah an inman a, pawn lam thlengin an inkawmngeih," tiin an ram pawn player Alvaro Vazquez (8 goals, 2 assists), Jorge Diaz (8 goals, 1 assist) leh Adrian Luna ( 6 goals, 7 assist) a fak a. Hyderabad tan fimkhur a ṭul.

Ka lawm e
Blasters-in Puitea an nei a, Pathianni zanah bul a ṭan ngei pawh a rinawm - Hyderabad lamah goalkeeper Lalbiakhlua Jongte leh midfielder Mark Zothanpuia awm mah se an inlan a rinawm chiah lo.

Puitea chuan, "Mizoram Football Association vanga tun dinhmun thleng ka ni a, an chungah lawmthu ka sawi. Tun thlengin ka chanchin an rawn ngaihven reng a, ka lawm takzet," tiin Vanglaini a hrilh a, Mizoram Premier League awm chu a chhawr thu a sawi.

Bethlehem Vengthlang tlangval hian final hial an luh hnuah pawh amah duhsaktute a hre reng. Puitea chuan, "Lockdown laiin season chawlh kan hmang a, mahse, khatih chhung zawng khan kan veng chuan chhuah phalna min pe a, training ka neih min phalsak reng a ni," a ti.

Puitea chuan, "Tata Trust hmunah training ka nei ṭhin a, a hmunah coach Lalrozama Fanai leh Rochhingpuia ten ṭhahnem ngai takin min pui ṭhin," a ti a, Blasters tana hmun pawimawh a chan theih chhan chu amah puitute vang a nih thu a sawi.

A hot dawn
ISL final-ah a hmuna entu awm phal a ni tawh a, ticket 15,000 zawrhchhuah chu nimin khan hralh zawh vek a ni tawh - a bik takin Blasters-in fans an ngah leh dawn tih a chiang a, Hyderabad coach Manuel Marquez chuan, "Kerala hian fans an ngah tih ka hria a, kan fan-ten min puih ve a ngai a ni," tiin ngenna a siam hial!

Puitea chuan, "Mizo mipuite pawh min lo ṭawiawm turin ka sawm a, in lo tih fo tawh ṭhin anga min ṭawngṭaipui leh turin ka ngen che u a ni," a ti a, Aizawl FC midfielder hlui chuan sawi zawmin, "Top four-ah khan Bagan ka huphurh ber a, mahse, an tlang ta lo. Hyderabad ka zuam ta sawt tihna a ni lo.

"Player tam zawk hi kum hnih awm ho tawh an ni a, an inman em em. Keini aiin an khel pawh a puitling zawk em aw, tih tur a ni. Mahse, league-ah Covid-19 in a tibuai ve a, ngai an awh leh tawh loin ka hria. Champion-na chance a awm zen zen lo a, hei vang hian kan chance neihah chuan champion ngei ka duh," tiin Vanglaini a hrilh.

Puitea hian tun season-a match 22 an khelh tawhah vawi 19 khelin assist vawi thum a nei a, Bethlehem Vengthlang tlangval chuan, "Champion turin chance kan nei ve ve," tiin team ṭha zawk an awm loh thu a sawi.

ISL Semifinal
First Leg
March 11, Zirtawpni Zan
Jamshedpur 0 - 1 Kerala Blasters
KER: Sahal Abdul Samad 38'
March 12, Inrinni Zan
Hyderabad FC 3 - 1 ATK Mohun Bagan
HYD: Bartholomew Ogbeche 45+2'; Yasir Mohammad 58'; Javier Siverio 64'
AMB: Roy Krishna 18'
Second Leg
March 15, Thawhlehni Zan
Kerala Blasters 1 - 1 Jamshedpur FC
KER: Adrian Luna 18'
JAM: Pronay Halder 50'
*Semifinal pahnih belhkhawmah 2-1 in Blasters an chak
March 16, Nilaini Zan
ATK Mohun Bagan 1 - 0 Hyderabad FC
AMB: Roy Krishna 79'
*Semifinal pahnih belhkhawmah 3-2 in Hyderabad an chak
March 20, Pathianni Zan - Final
Hyderabad FC 7:30 PM Kerala Blasters