Netherlands an chak, Italy an tling

Nations League finals luh tumin Netherlands-in Poland 2-1 in an hneh a, amaherawhchu Italy-in Bosnia-Herzegovina 2-0 an hneh avangin Frank de Boer hote pahnihnaah an lungawi a ṭul ta thung.

Poland-in Kamil Jozwiak hmangin minute 5-na lekah goal an khung a, amaherawhchu mikhual Netherlands-in minute 77-naah Memphis Depay-a penalty hmangin siphurh an sut a, minute 84-naah Liverpool midfielder Georginio Wijnaldum-a'n chakna goal a tauh lut.

Oranje-in coach thar De Boer-a kaihhruaina hnuaiah match li chhung chak hmel an hmuh loh hnuin a zawnin hnehna an chang. Poland lamin hnehna chang zo lo mah se chhuanlam tur an nei thei ang. 

An player ṭha ber Robert Lewandowski-a'n minute 45 chauh a khel a, a awm lai hian goal khung tam zawk an ni. Bayern Munich striker Lewy hian inkhelh banah hliam a neih avanga minute 45 chauh khel tura ruahmanna an siam sa thu a sawi.

Stadium Grbavica, Sarajevo-ah Italy-in harsatna an tawk lo. Minute 22-naah Andrea Belotti-a'n Azzuri tan goal hmahruai a khung a, Domenico Berardi-a'n minute 68-naah pet goal leh bawkin Bosnia-Herzegovina 2-0 in an hneh.