NBA draft Timberwolves-in Anthony an thlang

Kumin NBA draft chu Nilaini khan ESPN Studios, Connecticut-ah conference call hmangin neih a ni a, first pick changtu Minnesota Timberwolves chuan Georgia guard Anthony Edwards an thlang.

Kum 19 mi Anthony hian a hlawhtlinna chan duhawm tak chu cancer vanga thi a nu leh a pi tan a hlan. NBA draft 2020 number 1 pick chuan, "Ka hun tawn duhawm tak hi thuin ka sawifiah thiam lo. Kan chhungkua chhiat tawhna avangin ka hnuk a ulh a, hun harsa hi ka paltlang ngei ang. Ka hlawhtlinna hi ka nu leh ka pi tan ka hlan, " tiin a sawi.

Inremna awmsa danah chuan Edwards hain Timberwolves-ah hian kum li daih contract a ziak ang a, dollar maktaduai 44.2 a hlawh ang. Season liam taa Western Conference-a table mawngphaha awm Golden State Warriors chuan feet sariha sang Memphis centre James Wiseman an thlang thung.

Third pick hi point guard LaMelo Ball a ni a, Charlotte Hornets-in an thlang. Ani hi New Orleans Pelicans point guard Lonzo unaupa a ni a, kum 2017 khan a u zawk hi number 2 pick a ni. NBA draft history-ah unaua thlan hmasak panga zinga tel hmasa ber an ni.

NBA draft hi kum tinin kum 1947 aṭang khan neih ṭhin a ni a, basketball khel ṭhin tana NBA zawmna hun ṭha a ni. Draft-a dahte hi college player an ni ber a, international player-te pawh an tel ṭhin bawk.

Draft hi June thla tawp lamah neih ṭhin a ni a, kuminah erawh Covid-19 vangin a hun ngaiah neih theih a ni lo. 2020 Draft hi round hnihah ṭhenin player 60 an thlang chhuak.

NBA Draft-ah hian team vannei an awm a, player thlang hmasa tur team hi draft lottery hmangin pawh ṭhin a ni. Hetah hian season khelh hnuhnun bera playoff khel pha lo te chauh an tel thei a, thlang hmasa tur an pawhnaah hian result nei chhe team tan thlan hmasak chance a sang.

Hemi a nih avang hian kuminah pawh vawi ruk zet NBA champion ni tawh Golden State Warriors pawh a thlang hmasa ber dawttu an ni.