Real Madrid tan champion rim a nam

La Liga champion ni turin Real Madrid chuan an dinhmun an sawhnghet zel. Spanish club lian hian Inrinni zan khan Real Sociedad chu 4-1 in an sawp a, khelh zat inangah pahnihna Sevilla aiin point riatin an sang fal ta.

Real Sociedad erawh chak ni se chuan pathumna ni thei tur an ni, an chak loh miau avangin paruknaah an awm - season thara Champions League khelh phak a harsa ṭalh tawh dawn, kawng erawh zau takin a la inhawng ve tho.

An fal ta
Real Madrid elpui ber Sevilla chu Zirtawpni zan khan Alaves nen 0-0 in an inhnehtawk. Carlo Ancelotti nauten hmahruai fal theihna remchang an nei tih hre sa chungin Real Sociedad an mikhual a, beiseina pawh an nei sang hle.

Santiago Bernabeu Stadium-a inkhelah rin lawk loh danin thil a thleng hmasa. Mikhual Sociedad lamin minute 10-na lekah goal an khung hmasa. Mikel Oyarzabal-a penalty hmangin hma an hruai, a hnu lamah erawh shot an nei zui tawh lo.

Inkhel thununtu Real Madrid tan Eduardo Camavinga leh Luka Modric ten goal mawi hmangin an chhanglet a, chawlhlawk laiin 2-1 in hma an hruai leh hman. A goal hmasa pahnih an hnawlsak hnuah Karim Benzema-a'n penalty a khung a, substitute Marco Asensio goal kan hmu bawk.

Beiseina nung
Real Madrid manager Ancelotti chuan, "A la hma deuh a ni mai thei, chutih rualin La Liga champion ni turin beiseina kan nei. Kal fal theihna hun a inhawng tih ka hria, bawhpelh loa kan chhawr ṭangkai thei hi a lawmawm hle.

"Hnehna kan channa hian inrintawkna min pek belh se. Tun ṭuma ṭha taka kan khelh ang hian Paris Saint-Germain kan khelh hunah pawh khel chhuak thei ila tih chu duhthusam a ni," tiin a sawi a, league chauh ni loin Champions League a thlir tel.

Italian manager hian Sociedad lakah Fede Valverde leh Toni Kroos te a chhawr thei lo, a player pawimawh pahnih hi Paris club an hmachhawn hunah a chawr thei dawn em, tih a la chiang lo, an dinhmun endik leh hmasak a ni ang.