Beiseina kan nei sang - Venkatesh

Indian Arrows head coach Shanmugam Venkatesh chuan tun season I League-ah beiseina an neihsan thu a sawi. Vawiin chawhnu dar 2:00 hian Arrows-in Naihati Stadium, Kolkata-ah Sudeva Delhi an hmachhawn ang.

Venkatesh chuan, "Covid-19 vanga inelna khelh theih loh chhung khan chawlh kan nei lo a, Bhubaneshwar-ah training ṭha takin kan kalpui. Odisha sorkar chungah kan lawm a, kan player-te chungah beiseina sang tak ka nei a ni," tiin a sawi.

Indian Arrows hian first round-ah Trau an hmachhawn tawh a, nikum December thla khan goal awm loin an inhnehtawk. Kum 43 mi Venkatesh chuan sawi chhunzawmin, "Ka ngaihdanah chuan I League-ah hian tharum a ngai a, kan tan inzirna ṭha tak a ni dawn. Player naupang zawkte pawhin nasa takin hma an sawn thei ang," tiin a sawi.

Arrows enkawltu Venkatesh hi Indian midfielder ṭha ber zinga mi a ni ṭhin a, Venkatesh hi National Football League Best Player-ah ṭum hnih thlan a nih tawh bakah AIFF Player of the Year-ah thlan a ni tawh bawk.

Vawiin Inkhel Tur
Sudeva Delhi 2:00 PM Indian Arrows
Real Kashmir 4:30 PM Kenre
RoundGlass Punjab 7:30 PM Churchill Brothers