Lammualah Chawnpui a par

Mc Dowell's No. 1 Soda Mizoram Premier League Season 7-ah kai thar Chawnpui FC chuan Nilaini zan khan Chanmari FC chu 2-1 in an hneh a, MPL season tawp boruak ngaihnawm tawh sa chu a tihngaihnawm belh.

Minute 90 thlirin Chawnpui FC-in point thum hlawhchhuah an phu. Lammual inkhel hmuhnawm takah Vanlalthanga hmangin Chawnpuiin hma an hruai a, Jerry F. Lalnunsanga'n goal hnih khungin belhin Chanmari tana MC Malsawmzuala goal khung chu hun tawp lama beiseina tluan tling lo siamtu chauh a ni.

A hunah Thanga
Chawnpui tan tun season-ah Vanlalthanga a vul a, amaherawhchu Serchhip-a inelna neih a nih hnuah season ṭantirh angin a langsar tawh lo. Amaherawhchu Hualngohmun tlangval hi Chanmari nen an inkhelh ṭumin a hunah tak a inlar a, a goal khung vangin inkhel a danglam.

Chanmari FC-in inkhel bul an ṭan ṭha a, Vanlalbiaa Chhangte chuan a chance ṭha goal zawnah a pet loin Jeremy Laldinpuia'n goal ban a pet per bakah MC-a goal khung tur chu keeper Thomas Lalthlamuana'n a dan sak bawk.

Chawnpui an talbuai lai takin Thanga a rawn lang a, ani hian Lalruatfela (RF-a) ball pek chu chhak lam kil aṭanga lalutin defender tawnhriat nei ṭha C. Lalrosanga leh Lalmuanawma te a paltlang vek hnuah goal pawimawh a khung. Minute kuaa goal lut hian inkhel kalhmang a thlak a, he goal hi lut lo se Chawnpui tan thawhchhuah a har ang.

A hmuhnawm zel...
Club hming langsar zawkin goal an phur a, inkhel a nun phah hle. Team pahnih an innawr tawn zak zak a, player nei ṭha zawka ngaih Chanmari FC-in ball erawh an chang tam zawk.

Halftime-ah Chawnpui an infuih ṭha a, man of the match-a thlan winger K. Rohluahpuia hming lam hmaih a thiang lo. Khawruhlian tlangval K. Mama ball khalh ṭhat zarah mual sir aṭangin cross ball ṭha a lut a, Vanrammawia Ngente chuan woodwork tih perin hemi rawn let chu Jerry-a'n goal-ah a chantir.

Chawnpui an fimkhur a, chutihrualin counter attack leh freekick-ah erawh an hlauhawm reng a, Republic Veng tlangval RF-a'n freekick aṭangin woodwork a tih per a, goal dang erawh an khung belh tawh lo.

Hun tawp hamrik thlenga boruak a ṭan theih nan Chanmariin minute 74-naah an siphurh an sut ṭhen a, halfway line aṭanga R. Lalawmpuia freekick vawrhluh chu MC-a'n harsatna nei loin a tauh lut. Mahse, Chawngthansanga hoten goal an khung belh thei lo a, Chanmari FC-in coach thar hnuaiah hnehna an la chang lo.