World number 1 thar Medvedev

Association of Tennis Professionals (ATP) chuan world ranking thar an ti chhuak. Mipa tennis thuneitu sang ranking siam tharah hian Daniil Medvedev chu pakhatna a ni a, hun rei tak chhung a chung bera vawk lal len Novak Djokovic a hnuk thla.

Russian tlangval Medvedev hian point 8,615 a hmu a, pahnihna Novak Djokovic (8,465 points) nena an inthlauhna erawh a la sang lo hle. Serbian star Novak hi a chung berah hian kar 31 chhung awm tawhin, ani aia number 1 ni rei an awm lo.

Kum 26 mi Medvedev chuan, "Naupang ka nih lai aṭangin number 1 nih hi chu ka duhthusam a ni reng ṭhin, tuna dinhmun sang ka chang ve thei ta hi ka lawm takzet. Ka ṭhiante leh chhungte hnen aṭang pawhin lawmpuina ka dawng hnem hle," a ti.

Roger Federer, Rafael Nadal, Djokovic leh Andy Murray te tih lohah chuan, tun hnai kum 18 chhungin Medvedev hi number 1 ni thei hmasa leh awmchhun a ni, a thlen chin hi sawi nep theih a ni lo.

Russian player zingah chuan Yevgeny Kafelnikov leh Marat Safin te hnung zuiin number 1 ni thei pathumna a ni a, 6ft 6in a sang player hi number 1 ni thei sang ber a ni bawk.

Tun hnai kum thum chhung chu Medvedev hi a khel ṭha tluang. A vawi khat nan US Open nomawi a chawi, heng bakah hian Grand Slam dang pathum Australian Open, French Open leh Wimbledon-ah a thleng sang vek a ni.

Season bul ṭan fuh tak Rafael Nadal pawhin hma a sawn. Spanish star hi number 6 aṭangin palinaah a kai sang - kuminah hneh loh tawng loin a kaltluang mek a, inelna lian French Open an khelh meuh chuan a ranking a siamṭha hman viau dawn niin a lang.