Buaina aiah remna zawk le - Thomas Bach

Beijing Winter Olympics a ṭiak a, kharna hunah International Olympic Committee president Thomas Bach chuan khawvelin buaina ai chuan remna a mamawh thu a sawi - Russia leh Ukraine boruak sang tak vanga sawi a ni.

Bach chuan, "Olympic Games hi chuan inṭhenhranna aiin inpumkhatna chu a thupui a ni zawk. Khawvel ram hruaitu hrang hrangte hian infiammite hnen aṭangin zir tur an nei, chu chu remna leh muanna a ni," a ti a, a thusawi ṭawmpuitu an tam ang.

German pachal chuan sawi zawmin, "Infiammite chuan mahni leh ram tan theihtawp tak meuh an chhuah a, anmahnia thil awm ṭha ber an phawrh chhuak ṭhin. Chumi rual chiah chuan an elpuite pawh an lawmpui thei.

"Kan in zah tawn a ni satliah lo, kan ram chu chhan hrang hrang vangin min ṭhen hrang a ni mai thei, kan taksa leh rilru erawh a inpawh tawnin, lawmna kan in lawmpui ṭhin hi infiamna ropuina chu a ni," a ti.

Hripui leng vangin infiammi tam takin buaina an tawk, he buaina hi a la tawp mai dawn lo niin a lang. Bach chuan, "He hri leng hi kan hneh duh a nih chuan a rang thei ang bera vaccine kan lak a pawimawh.

"Sang tak thlen kan tum tur a ni a, tun hma aia chak leh inpumkhat zawk nih chu Olympic thil tum a la ni reng. Vaccine kan lak hian midang hmakhua kan ngaihsak tihna a ni," tiin infiammite chu vaccine la turin a fuih.

Beijing Winter Olympics-ah hian gold medal 16 latu Norway an champion a, a pumpuiah medal 37 an la. India chu inlan ve bawk mah se medal an hlawh chhuak lo. Ram 109 aṭangin infiammi 3,000 ten infiamna peng hrang 15-ah inelna an nei a ni.