Cheng vaibelchhe 600 man lilam

Tata Indian Premier League 2022 hi IPL ṭum 15-na tur a ni a, team 10 tel turten players an leina leh humhalhna zat chu cheng vaibelchhe 600 vel a ni. Kar liam ta khan infiamna khawvel mit chu Banguluru ITC Gardenia Hotel lamah a fu a ni ber awm e.

Lilam hi ni hnih chhung neih a ni a, drama pui leh brouak sosang inthlak danglam zawk zawk kan hmu a ni ber. Lilam ni hmasa zawka team che na tak, a ni hnuhnung darkar tawp lama si ruk la a thawk, players rinkai hralh kal lo, players rin loh taka to leh a lilam kaihruaitu auctioneer Hugh Edmeadus luhaia thidang thlengin hmuh tur a awm vek.

Franchise hausa, sum hman tur inang lo

Chennai Super Kings, Mumbai Indians, Kolkata Knight Riders leh Delhi Capitals ten an player hlui pali an hum avangin cheng vaibelchhe 90 hman phal zat aṭangin vaibelchhe 48 vel chiah lilam niah hman tur an nei tawh. Punjab Kings erawhin player pahnih chiah an hum a, vaibelchhe 72 tehmeuh hman tur an la nei.

Team tel thar Lucknow Super Giants leh Gujarat Titans-ten team dang pariat te chelh bang player aṭangin pathum an lei lawk thei a, an quota an hmang zo. Lucknow leh Gujarat ten vbch 59 leh vbch 52 ak chungin lilam ni an hmachhawn ve bawk.

Lilam chu

IPL awm tawh zawng zawnga lilam boruak hot leh sum chevel tamna berah hian, team 10-in players 204 an lei a, ram pawn lam player 67 zet an inhnamhnawih a, cheng vaibelchhe 550 vel a vir kual. Team pariat awmsaten team thar an din a, nikum lama team nen chuan a danglam ta hle. Team rawn inlar thar tur pahnih Lucknow leh Gujarat te lahin squad zahpui awm loh tak an rem khawm bawk kan ti thei ang.

IPL history-ah a vawi khatna atan player 11 zet mai cheng vaibelchhe 10 pela lei an awm ṭum a ni. Ishan Kishan chu a khelna sa Mumbai Indians neitunu Nita Ambani-i'n engtikawng zawng maha chan tum loin cheng vaibelchhe 15 leh nuai 25-in an chhang a, IPL 2022-a players lilam zinga man to ber a ni.

Sum hmang thiam tia fak hlawh, CSK lamin IPL lilam an hmachhawn hnua a vawi khat nan player pakhat lei nan cheng vaibelchhe 10 aia tam an seng. CSK hian an player ni sa tho Deepak Chahar chu chan tum hauh loin vaibelchhe 14-in an hum

thei bawk.

Thu nawi

IPL team hlawhtling ber Mumbai Indians-in kumina inlan thei meuh loh tur Jofra Archer a lei nan cheng vaibelchhe riat an inhuam kha mi tam tak mak tih a nih rualin, hma khua thui tak an thlir tih a hriat theih. He contract hi season thum daih a nih avangin, hun lo la kal zel tura Jaspir Bumrah nena an inkawp tur hi Nita Ambani staff-te ho game plan a ni tih erawh a chiang.

Hmanni lawka Under 19 World Cup khelh zawh taka Man of the Series, South Africa rawlthar kum 18 mi Dewald Brevis tan cheng vaibelchhe thum lai sen an huam te hian, tawnhriat ngah leh rawlthar talent nei inchawhpawlh mawi tawk team siam an tum tiin a sawi theih bawk awm e.

India tana la inlan lo (uncapped) zinga man to ber ni turin Lucknow chuan Avesh Khan chu vbch 10 lawihin an lei a, risk an la fuh em, tih chu hunin a hril ang.

Thu mak

IPL a player hlawhtling ber leh khel hnem ber zinga mi Suresh Raina te erawh chuai lam an lo pan ve ta niin a lang. Team 10 zinga pakhat mahin chhan ena an en lo leh Australia batsman ropui Steve Smith-a ten leitu tur an hai tlat te kha thil mak a tling ve viau mai.

Tin, nikum KKR captain leh England captain ṭanglai Eoin Morgan leh Australia captain Aaron Finch a te lei loh zinga an tel hi mi ṭhahnem tak barakhaihtu a tling bawk.

Tlipna

Khatia tun kar tawp liam ta ni hnih chhung infiamna khawvel ngaihven IPL lilam chu, keini 1st class cricket khel tura inbuatsaih mek, kan thlenna hotel lama quarantine hun kan hman mek paha ka lo thlir lai mek chuan, kan khelhpui leh tumpui tur ṭhahnem takte IPL team hrang hrangah an kal hlawm.

Crorepati naupang ṭhahnem tak an awm phah bakah, kumin IPL 2022 hian hriat ngai loh hming lar thar engemaw zat an rawn chhawp leh a, player man to tak beisei pha ta lo te, pheichham man ang maia, man man taka an team neituten an lei, an man let aia ropuia rawn inlan tur te an awm leh nuk dawn tih ka lo mitthla.

Engtik niah emaw chuan, he IPL tualzawl hi, Zofate tual chaina hmun a la ni ve dawn tih ring tlatin, ka teammate rawlthar leh talent nei ṭha tak tak te chu ka phak ang tawk tawkin ka lo fuih ve a ni.

Hri leng karah IPL hi huaihawt theih a ni dawn nge dawn lo tia cricket khawvel a buai lai mekin Governing Council a tel, Cricket Association of Mizoram general secretary Mamon Majumder te thawhrimna leh hmalakna zarah auction tluang takin an nei thei a, inelna pawh tluang taka nei turin duhsakna ka hlan e.