East Bengal tan Lalrinliana a rintlak!

2.2.22-ah East Bengal leh Chennaiyin FC chu 2-2 in an inhnehtawk a, goal hnuhnung ber thuntu chu East Bengal jersey no. 22 a ni!

Nilaini zan Indian Super League inkhela Kolkata club tana draw-na goal khungtu hi Dungtlang rawlthar Lalrinliana Hnamte (Terina) a ni.

Aizawl aṭanga Dungtlang hlat zawng chu kilometre 200 chuang a ni a, Kolkata aṭanga a hlat zawng phei chu km 1,000 chuang a ni. Mahse, chu Dungtlang khuaa piang Mizo rawlthar hian Dungtlang leh Kolkata khawpui chu thinlung hmun khatin a awmtir.

East Bengal hi 2-1 in an hnufual reng a, an tlawm mai dawna a lan laiin Lalrinliana Hnamte a rawn inlar - Terina hian hun pek belhah mawi lutukin goal a rawn tauh lut a, Mizo rawltharin Indian club lian a chhanhim.

MFA Grassroots aṭanga bul ṭan Terina chuan, "Goal ka khung khan engtin nge ka awm hre lo. Ka rilruah engtiklai pawha min fuih phur rengtu ka nu leh pa an lo lang nghal a, ka lawmna kha thua sawifiah chi a ni lo," tiin Vanglaini a hrilh a, mang ramah Dungtlang tlangval a cheng mek e.

Mizo channa
Minute 15 pawh a tlin hmain Chennaiyin lamin Hira Mondal (own goal) leh Ninthoinganba Meetei hmangin goal an khung der a, South Indian club hian harsatna nei loin hnehna an chang mai dawn niin a lang.

Chennaiyin goal hmasa zawk hi Mizo tlangval Jerry Lalrinzuala thawhchhuah a ni. Bethlehem Veng tlangval hian mual vei lam sir aṭangin ball duhthusam a thlawh lut a, Suhail Pasha chuan lo tauh thawiin Hira Mondal chuan an lamah a dang lut zui.

South Indian club an insum lo. Minute 15-naah Ninthoinganba chuan Chennaiyin tan ṭha zetin a khung ve leh a, an dinhmun a ṭha hle. Mahse, East Bengal an beidawng lo. Minute 61-naah Darren Sidoel chuan freekick mawi lutuk hmangin si phurh a rawn sut ṭhen a, Kolkata club tan beiseina a siam.

Minute 77-naah Terina a rawn lut a, Marcelo Ribeiro tan goal khungna remchang a siamsak nghal - Brazilian striker-in a hlah a, uiawm tak a ni. Hun pek belh minute khatnaah erawh Mizo tlangval hian kut ruaka an kir mai tur ngaingam loin mawhphurhna a la a, corner aṭanga ball kal chu mawi lutukin a tauh lut - East Bengal tan point hlu tak a hlawh chhuak.

Mang ram
Tun season ISL ṭan a nih hmain Terina hian Indian football chu sawi loh, Mizo football-ah pawh hriat a hlawh tawk lo. MFA hnuaia Grassroots-ah inzirin Chanmari FC Under-18 tan a khelh hnuah Mizo club ruahmannain Pune City academy a zawm a, I League U18 a a inlan hnuah Chanmari-ah bawk a kir.

Terina hian amah siam liantu club tan MFA Super Cup leh Independence Day Cup a khel hman a, Mizoram Premier League-a a inlan hmain kum 2020 khan Hyderabad FC reserves team a zawm.

Season hmasa tawp rual khan Hyderabad-a a contract a hmang zo a, ISL club ṭha hian senior team-ah khel tura contract pek tiam mah se East Bengal an lo lang a, Kolkata club lian sawmna a pawm - a tihfuhzia inhrilh nawn a ngai lo.

Terina chuan, "ISL-a ka season hmasa ber a nih avangin sang tak ka beisei lo. Match li emaw match thum emaw ka khelh phak chuan ka lawm ang, ka ti a, ka beisei aiin khelhna hmun ka chang tam a ni," a ti - ISL-a match 15 an khelh tawhah vawi 12 a inlan.

Danglamna
East Bengal-in beisei angin season an hmang ṭha lo a, Chennaiyin an inhnehtawkpui avang hian table mawngphah aṭangin an tal chhuak ve chiah.

December 28 khan season ṭan tira coach atana an lak Manolo Díaz an ban a, I League lama an coach hlui Mario Rivera chuan January 1 aṭang khan a thlak.

Terina chuan, "Coach hmasa hnuaiah kha chuan pressing game khel tura tih kan ni a, ball ken rei theih a ni lo. Tuna kan coach erawh chutiang a ni chiah lo a, kan duh dan ang taka khel turin zalenna kan nei a, a nuam hle a ni," tiin Vanglaini a hrilh.

Dungtlang rawlthar Terina hian December 23 khan a club hlui Hyderabad a hmachhawn a, he inkhelah hian hero of the match atan thlan a lo ni tawh bawk - ISL-a a season hmasa bera a record hi uanpui tham a ni.