Zan lamah inkhel en châkawm Ramhlun North Vs Aizawl FC

Mc Dowell's No. 1 Soda Mizoram Premier League Season 7 ṭan hmaa champion rinkai zinga mi Ramhlun North leh Aizawl FC te hi an che sual a nih chuan semifinal thleng pha lo thei dinhmunah an ding mek.

Chutihrualin Ramhlun North hian point khat chauh la hmu mah se zanin dar 7:00-a Aizawl FC nen an inkhel turah hian an foreigner neih sa Waheed Adekunle bakah foregner dang pahnih midfielder John Ampong leh striker Bamba Musah Moctar te an neih belh avangin inkhel a hmuhnawm sawt ang.

Beisei pha lo

Aizawl FC-in match li aṭangin point nga chiah an la hmu a, an theihna thlirin engtik lai pawha a sang pali zinga awm tur ni mah se semifinal khel pha china awm an harsat.

AFC coach Gift Raikhan chuan, "Ramhlun North hi team ṭha tak an ni a, foreigner an neih belh tih pawh kan hria. Chutihrualin Mizoram chhung football chu a dang a, foreigner an che ṭha ngei ngei ang tih hi inkhel dan hmang leh Lammual dinhmun avangin a hriat loh a. A pawimawh ber chu kan theihna anga khelh chhuah theih a ni a, thawhrim a ṭul bawk. Tuna ka player-te hi hnehna min chan pui turin ka ring tawk," tiin foreinger neih belh mah se a hlauh loh thu a sawi.

I League club aia beisei pha lo chu Ramhlun North an ni a, anni hian sum hmang tam mah se point khat chiah an la hmu a, an match hnuhnung bera Police an hmachhawn ṭumin goal nga zet an chhuah bawk.

Ramhlun North secretary K. Lalenghluna (Maenga) chuan, "Kan insiam ṭhat a hun a, Aizawl FC laka insiam ṭhat erawh a awlsam dawn lo. Beiseina nen result ṭha kan thlir a, kan vanneih hun a inher chhuah ve ngei ka ring," tiin a sawi.