October 23 aṭangin MSL Player tel an hraw dawn

Tualchhung basketball inelna sang ber Mizoram Super League Season 4 chu October 23 aṭangin khelh ṭan a ni dawn a, inkhel tihmuhnawm tham player hraw tak tak an khel dawn. Inrinni khan state pawn player leh foreigner lak hun a tawp chiah a, MSL club parukin player an ziaklut vek.

Kalphung chu...

MSL4-ah hian foreigner pakhat bakah state pawn player pahnih a lak theih a, club thar BC Bethlehem chu la kim awmchhun an ni. Amaherawhchu, MSL-ah hian tualchhung player-te tan hamṭhatna siam a ni a, playing five-ah foreigner emaw state pawn player emaw pakhat chauh chhawr thei a ni.

MSL3-ah khan quarter khat bikah foreigner emaw state pawn player hi a ruala pahnih luh phalsak a ni a, tun season aṭangin he dan hi tihtawp a ni ang.

A en tlak dawn

MSL awm hnuah Mizoram basketball a ṭhang a, India ram hmun danga basketball player-te pawhin Mizorama khelh an châk a, an player lakluh thlirin ṭum dang zawng aiin a hmuhnawm dawn niin a lang.

Champion lai BCA chuan 3x3 Basketball World Tour-a Bangalore tana khel mek Sowkin Shetty (6' 6") bakah USA aṭangin feet ruk leh inches sariha sang Cameron Anderson an lalut.

Vawi hnih champion tawh Khatla TBL-in Chicago-a seilian Vernon Young an nei thar a, Tuikual South-in Shashank Jayashankar Rai (Karnataka) leh Desmond Antwiner Medder (Arizona) te an lalut bawk.

Zarkawt Serpents-in an club-a rinawm Sahil Sharma bakah Ravi Bhardwaj an la thei a, 6ft 8in a sang forward hi UBA Pro League hmasa bera Most Valuable player a ni a, danglamna thei thei tur a ni.

BC Bethlehem-in MSL tling puitu Brian an chelh a, Harissh Muthukumar leh Arvind Arumugam te an lak belh bawk. India team tana khel pha Arvind hnei theih hi MSL club tan inchhuanna tham a tling.

Mission Veng Vikings-in American player Ronald March hmangin MSL-ah an champion tawh a, tun ṭumah pawh American player Dijon Najee Farr lak nan sum an seng nawn leh nghat.

October thla tawpa MSL ṭan a nih hunah player langsar-te hi an khelh hman vek beisei a ni a, inelna ṭantirh aṭanga team tin an kim nghal ṭhap chuan inelna hlutna a sang sawt ang.

Zarkawt BCA
1 Sowkin Shetty Mangalore, Karnataka
2 Cameron Anderson Virginia, USA
Khatla TBL
1 Vernon Young Chicago, Illinois
Tuikual South
1 Shashank Jayashankar Rai Mangalore, Karnataka
2 Desmond Antwiner Medder Phoenix, Arizona
Zarkawt Serpents
1 Sahil Sharma Bonda Narengi Guwahati
2 Ravi Bhardwaj Chandigarh
BC Bethlehem
1 Brian Amour Irakoze Kavakure Republic of Burundi
2 Harissh Muthukumar Thiruppalai, Tamil Nadu
3 Arvind Arumugam Mandya, Karnataka
Mission Veng Vikings
1 Dijon Najee Farr South Carolina, USA