Mancher City-in striker thar an nei

Premier League hmahruaitu Manchester City chuan striker thar an nei a, Argentina forward Julian Alvarez chu River Plate aṭangin pound maktaduai 14.1 in an lei - Argentine club-ah hian season tawp thleng loan-in a khel zui ang.

Kum 22 mi forward hian Etihad Stadium-ah hian kum nga leh a chanve chhung khel turin contract a ziak a, River president Jorge Brito chuan an player hi a contract-a chhuah phalna zat an dah anga an chhuahtir thu a sawi.

Alvarez hian River tan inelna hrang hrangah match 96 khelin goal 36 a khung a, South American football-a nomawi chawi theih ang chu River Plate tan hian a chawi kim.

Argentina tana vawi ruk inlan tawh forward hi nikum Copa America champion team zingah khan a tel a, nikum khan South American Footballer of the Year-ah thlan a ni bawk.

City director of football Txiki Begiristain chuan, "A theihna tak tak pholang a, top player a nih theihna turin Alvarez hi kan puih theih kan beisei a ni," a ti.

River president Brito chuan, "Julian-a hnathawh kan en chuan, a release clause pein an lei vat ang tih hi chu thil chiangsa a ni," a ti a, River coach Marcelo Gallardo chuan, "Sum ngah tak, khawvela club ṭha ber pawl a zawm thei a, kan hnenah a cham theih bawk avangin inremna ṭha tak a ni.

"Tun dinhmunah chuan City-in an mamawh hran lo a, keinin amah ang quality player zawn kan harsat dawn bawk si avangin loan-a a cham zui tur hi kan lawm hle a ni," tiin a sawi ve bawk.