Wawrinka-a'n Bedene a hneh

Grand Slam vawi thum cham­pion tawh Stan Wawrinka chuan Thawhṭanni zan khan Aljaz Bedene hnehin St Petersburg Open second round a lut a, Swiss star hian a match lehpekah chuan Karen Khachanov a hmachhawn leh ang.

US Open-ah khan Wawrinka hian third round-ah Milos Raonic a hneh lo a, chumi hnua a inkhelh lehna hmasa ber niin; a khingpui hi darkar khat leh minute 46 chhungin 7-5, 7-6 (7-5) in a hneh a ni.

World number 2 hlui Wawrinka hi hliam vangin a inkhel thei lo rei a, a hliam dam hnuah pawh beisei angin result ṭha a nei chuang lo. Tunah hian world number 88 a ni mek a, season tawpah a sang 50 zinga tel tumin hma a hruai mek.

Kum 33 mi Wawrinka chuan, "Ka inkhel leh thei hi ka lawm takzet, season hnih liam ta khan helai hmunah hian pahnihna ka lo ni tawh a, kuminah hnehna nena bul ka ṭan leh thei hi ka tan duhthusam a ni.

"Khachanov hi player ṭha tak a ni a, hma a sawn em avangin ka fimkhur a ngai dawn hle. Kum naupang deuh la ni mah se tharum a ngahin a tawh a khirh hle," tiin second round lama a khingpui tur chu awlsam taka nuai liam mai theih a nih bik loh tur thu a sawi.

First round inkhel dangah Mar­tin Klizan chua Evgeny Donskoy lakak 6-4, 6-4 in hnehna a chang a, quarterfinal lut tur chuan seeded pahnihna Fabio Fognini a paltlang a ngai dawn - 2012 final-a intawng pahnih an inhmachhawn leh dawn tihna a ni.

Tun season chhunga khelh tur Grand Slam pali an khel zo tawh a, player ṭhenkhat an hahchawlh laiin a ṭhen erawhin hming chher theihna hun atan an hmang mek zel. Moselle Open lamah chuan Ricardas Berankis-a'n Maximilian Marterer a hneh a, Yannick Maden erawh a khingpui tur Philipp Kohlschreiber a inhnuhdawh avangin inkhelh hah ngai loin a tlang theih phah.