Swiatek hmaah Collins a ding dawn

Australian Open 2022 hmeichhe singles an inthlifim chho zel, tunah chuan player pali chiah an dam ta. Vawiin chawhnu lam hian semifinal khelh a ni dawn - match hmasa zawkah world number 1 Ashleigh Barty leh Madison Keys te an inkhel ang.

Nimin khan quarterfinal khelh zawh niin, player ṭha Iga Swiatek leh Danielle Collins ten an khingpui ve ve an paltlang a, anni pahnih hian final ticket pakhat zawk an inchuh dawn, inkhel a hmuhnawm ang. Sony Ten 2-ah live a en theih a ni.

Nimin boruak
Melbouren Park-ah seeded 27-na Collins hian Alize Cornet chu 7-5, 6-1 in a hneh a, inkhel dangah Iga Swiatek chuan veteran player Kaia Kanepi chu 4-6, 7-6 (7-2), 6-3 a hnehin semifinal a in vaw kai ve bawk.

Poland nula Swiatek hian tleirawl ni chungin 2020 French Open title a la tawh, tun ṭumah hian a vawi hnih nan Grand Slam semifinal a khel dawn. Kum 36 mi Kanepi hneh turin darkar thum leh minute khat hun a mamawh.

Estonian player Kanepi hian a vawi sarih nan Grand Slam quarterfinal a khel a, mahse ṭum dang ang bawkin a chak lo zawkah a ṭang; a kum a tam deuh tawh avangin atan major title lak beiseina a tlem ta hle bawk.

Collins a lungawi
Nikum April thla khan Collins hi a chi kawngah bawk a awm avangin zai a ni. Tunah chuan khawvel player ṭha ber berte nen an inel tawk leh tawh hle, a vawi hnih nana Australian Open semifinal a khel thei tur chuan a tih lawm thu a sawi.

Kum 28 mi Collins chuan, "Zai ka nih hnuah thla tin hun bi pawh na lo zawkin ka tuar thei tawh a, hei hian training ka neih kawngah pawh nasa takin min pui. Player ṭha pali chauh la awm zinga ka tel thei hi ka lungawi," tiin a sawi a, tlak nghal mai erawh a tum bik lo.

Australian Open 2019 khan semifinal a lo lut tawh bawk a, mahse Petra Kvitova a ngam lo. Tennis inelna liana semifinal vawi hnih a luhnaah hian chak zawk nih a tum ruh hle a, chutih rualin a khingpui tur hi Swiatek a nih avangin a awlsam bik lo ang.

Swiatek a tlang
Darkar khat leh a chanve chhung leka Collins a chak laiin, semifinal lama a khingpui tur Swiatek erawhin quarterfinal paltlang turin darkar thum chuang a mamawh thung; thahrui an in hman hnem hleih hle tih a chiang.

Swiatek-i'n tihsual a ngah a, a tihsual avanga a khingpuiin point a hmuh chu 50 ngawt a tling! Heng zingah hian double faults vawi 12 a tel bawk, semifinal chinah chuan tihsual neih hnem hi a pawi thei dawn, vanduai ṭum chu ni se chak loh pui tham a ni.

Kum 20 mi Swiatek chuan, "Inkhel ropui tak a ni, min ṭantute awm lo chunga inkhel ni ila chuan ka chak zo kher lo ang," tiin a sawi. Swiatek hian a match hnuhnung pahnihah set a hloh hnuin hnehna a chang hram hram.