Australian Open ; Hma lam panin Zverev kal zel

Alexander Zverev tan Australian Open 2022 fourth round lut turin harsatna lian tham a awm lo. Nimin khan German tlangval hian Radu Albot chu darkar khat leh minute 57 chhung lekin 6-3, 6-4, 6-4 a hnehin third round a paltlang.

World number 3 hian tun inelna a hmang ṭha hle, a khingpuiin break point vawi nga hmu mah se a service a hloh miah lo; vawi 16 ngawt aces siam chungin inkhel a thunun hneh hle; a match lehpekah chuan Denis Shapovalov a hmachhawn dawn.

Seeded 14-na Shapovalov hian American tlangval Reilly Opelka chu 7-6 (7-4), 4-6, 6-3, 6-4 in a lo hneh ve bawk a, player ṭha an inthlitfim ṭan tawh avangin inkhel a hmuhnawm chho zel, set hloh lo a kal tluan reng a harsa tawh ang.

Kum 24 mi Zverev chuan, "Tun hnaiah Radu hi a khel ṭha ṭhin, set hloh loa ani ka hneh theih hi result lawmawm tak a ni. Duhthusam vek chu la ni lo mah se ka khelh danah ka lungawi," a ti. German star hian a vawi khat nan Grand Slam nomawi a beisei mek a ni.

Inkhel dang
Nimin inkhel dangah Matteo Berrettini chuan fiahna hautak a paltlang. Seeded pasarihna hian Carlos Alcaraz nen set nga an khelh hnuah 6-2, 7-6 (7-3), 4-6, 2-6, 7-6 (10-5) in hnehna a chang hram a, inelna neih laia inkhel hmuhnawm berte zinga mi a ni.

Rod Laver Arena-a hnehna a chan hnuah Berrettini chuan, "Alcaraz kha kum 18 mi chauh a la ni a, khatiang khawp khan inelna lianah a khel chhuak thei tawh. Tennis khelh dan tur phung hrang hrang a hre vek a, hmabak a nei êng hle," tiin a khingpui a fak.

Wimbledon finalist Berrettini hian a match lehpekah chuan Pablo Carreno Busta a hmachhawn dawn. Spanish tlangval seeded 19-na hian Sebastian Korda chu 6-4, 7-5, 7-6 (8-6), 6-3 in a lo hneh ve bawk a, service nei ṭha tak lakah fiahna a paltlang ve bawk a ni.

Seeded 17-na Gael Monfils chuan seeding lama a hnuai chiah Cristian Garin 7-6 (7-4), 6-1, 6-3 in a hneh. Italian tlangval thleng sang tura beisei zinga mi Lorenzo Sonego erawh Miomir Kecmanovic lakah 6-4, 6-7 (8-10), 6-2, 7-5 in a chak lo.