Champion lai Naomi Osaka a tla

Australian Open hmeichhe singles champion lai Naomi Osaka chu third round paltlang zo loin a tla.

Nimin tlai khan Japa-nese nula hi Amanda Anisi-mova nen darkar hnih leh minute 15 an inkhelh hnuin 4-6, 6-3, 7-6 (10-5) in a chak lo.

Seeded pawh chang phak lo Anisimova hian a match dawt lehah Ashleigh Barty a hmachhawn dawn. Seeded pakhatna hian match thum a khelh tawhah set a la hloh miah lo, nimin tlai khan Camila Giorgi chu 6-2, 6-3 in a sawp.

Osaka hnehtu Anisimova chuan, "Sawi mai tur pawh ka hre lo, a hmasa ber atan chuan Melbourne-a inkhelh hi nuam ka ti takzet. Mite chuan chak lo zawk turah min ngai ngei ang, ka khingpui kha player ṭha Naomi a nih avangin rin ka hlawh lo.

"Mahse, court ka luh aṭang khan ka zam lo a, minute tin mai kha nuam ka ti em em vek. Pressure nei miah loin nuamti takin tennis ka khel tawp mai a, a tawpah result ṭha chu a lo chhuak," tiin a sawi a, last 16-ah pawh nuamti taka khelh chhunzawm a tum ang.

Tournament draw a chhuah khan last 16-ah Barty leh Osaka an intum thei tur hian sawi a hlawh. Mahse tualchhung nula Barty a chak zel laiin Osaka erawh in a tlin ta lo. Japanese nula hian rilru lama harsatna a neih hnuah ngai a la awh leh thei chiah lo a ni.

Nimin hmeichhe singles inkhel dangah vawi hnih champion tawh Victoria Azarenka chuan Elina Svitolina chu 6-0, 6-2 in a sawp, player ṭha pahnih inkhelah Belarus nula a chungnung hle; last 16-ah French Open champion Barbora Krejcikova nen an inkhel leh ang.