Old Trafford-ah West Ham an leng lut dawn

Manchester United chuan zanin dar 8:30 hian David Moyes-a enkawl West Ham United an mikhual dawn. Hammers hi palinaah awmin Man United aiin point hnihin hmu tam mah se match khatin an khel tam zawk.

Nikum September 19 khan London Stadium-ah team pahnih hi an inkhel tawh a, Man United 2-1 in an chak. Jesse Lingard-a'n chakna goal a khung bakah Cristiano Ronaldo pawhin goal khung. Injury time-ah Mark Noble-a penalty pet chu David de Gea-a'n a dang bawk.

Amaherawhchu an intum hmasak hi chu Man United-in Ole Gunnar Solskjaer hnuaia champion an inbeisei lai an ni a, tunah erawh Norwegian manager an ban tawh a, team boruak pawh a danglam tawh hle.

Ralf Rangnick-a hnuaiah Man United la che ṭha tawk lo mah se an match hnuhnung berah Brentford 3-1 in an hneh. Goal khungtute chu academy aṭanga inzirchhuak Anthony Elanga, Mason Greenwood leh Marcus Rashford te an ni a, Scott McTominay a che ṭha bawk. Rangnick hian player taima chungah rinna a nghat chho dawn niin a lang.

Ronaldo erawh second half-a thlak a nih avangin a lungawi lo a, Man United manager lailawk Rangnick-a'n thutlukna dik a siam nachungin inkhelh banah a insawifiah zawkah a ṭang. German manager hian Ronaldo hi Hammers lakah hmun pawimawh a chantir a rinawm.

Hammers hian kuminah bul ṭan chhe lo mah se an match hnuhnung berah FA Cup-a an hneh tawh Leeds United 3-2 in an hneh lo a, David Moyes-a'n point an hloh chhanah an player-te chauh vangah a puh. Tun ṭumah erawh Man United-in kar laihawla inkhelh an neih laiin Hammers an hahdam thung a, Moyes-a hote inkhel turin an inpeih ang.