Inkhel en châkawm Chelsea Vs Spurs

Pathianni zan dar 10:00 hian Chelsea-in Stamford Bridge-ah Tottenham Hotspur an mikhual dawn a, London club pahnih inkhel tur hi tehfung hrang hranga thlirin en a châkawm vel vek.

Team ṭha pahnih inkhel tur hi champion tur zawnna lam ni loin Champions League khel tur zawnnaah a ngaih theih a, coach ṭha tehna a tih theih a, player ṭha fiahna a tih theih bawk ang.

Top 4 inchuhna
Chelsea-in season bul an ṭan ṭha a, September thla tawpah Manchester City hneh lo mah se October thlaah an chak fai vek a, hun rei tak hmahruaitu an ni. Amaherawhchu Thomas Tuchel-a hote hian December thla tira West Ham an hneh loh hnuah ngai an awm thei ta meuh lo.

Blues hi match hnuhnung pasarihah vawi khat chiah chak lo mah se vawi khat chauh tho an chak a, ṭum nga zet an inhnehtawk avangin champion beiseiawm aṭangin Champions League khel lo thei dinhmunah an ding hial.

Tuchel-a hote hian match 23 aṭangin point 44 an hmu a, Tottenham hian match 19 aṭangin point 36 an hmu thung. Spurs hian an khelh hmabak match li hi chak vek se point 48 an hmu dawn a, Chelsea chungah an awm daih dawn.

Uluk taka point dinhmun thlir chuan Chelsea hi season thara Champions League khel turin an him ta lo a, chuvangin Stamford Bridge-ah an elpui Spurs hi an hneh ngei ngei a ṭul.

Conte hnathawh
Chelsea ṭantute bulah Antonio Conte chanchin sawi nawn a ṭul lo, Italian manager hian Blues hi Premier League leh FA Cup-ah a champion pui avangin tu nge a nih an hrechiang. Spurs pawhin Conte theihna an hre chho zel.

Tottenham hian Conte hnuaia league match kua an khelhah hneh loh an nei miah lo a, ṭum ruk ngawt an chak bawk avangin dinhmun ṭhaah an ding. Spurs hian inhliam vangin Son Heung-Min chhawr thei lo mah se Harry Kane-a'n ngai a awh leh tawh a, England captain hi Chelsea tlarhnung tan ven tham a tling.

Tun season-ah Kane hi a che ṭha tawk lo a, league-ah goal nga chiah la khung mah se inelna hrang hrangah goal 13 a khung tling tawh. Chutihrualin Spurs hi mi pakhatah an innghat lo tih chu Leicester City an hneh ṭumin a hriat theih a, injury time-a Steven Bergwijn-a'n goal hnih a khung avangin Conte-a'n tlarhmaa player chhawr tur a ngah phah sawt.

Italian manager hian Spurs rilru put hmang a thlak a, player-ten an chet dan hmangin chak an duh tih a pholang. Chutihrualin an game khelh danah pawh coach ṭha kut hnu a lang a, an khingpuite attack an dan chah dan leh an nawr let dan chu hmuhnawm a tling.

Mahse maw...
Conte enkawl Tottenham hian fak an phu a, chutihrualin League cup semifinal-ah erawh ṭum hnih ngawt Chelsea lakah an tlawm tih hriat a ṭha. Thomas Tuchel-a hote hian Stamford Bridge-ah Spurs hi 2-0 a an hneh hnuin Tottenham Hotspur Stadium-ah 1-0 in an hneh nawn.

Hemi a nih avang hian Chelsea hi dah hniam ngawt a thiang lo. Chutihrualin Tuchel-a'n hnehna chan a duh chuan tlarhma player-te a chher hriam leh hret a ṭul. Nipui bazara manto taka an lakluh Romelu Lukaku chu mawhphurtu zingah ngaih a ni a, Belgian striker hi tlarhma tichaktu ni loin team tibuaitua ngai pawl an awm.

Lukaku hian tun season Premier League-ah goal nga chiah a la khung a, Conte hnuaia Inter Milan tana a khelh khan season hnih chhungin Serie A-ah goal 47 tehmeuh a khung. Belgian striker ṭantute erawh Tuchel-a'n a chhawr thiam tawk lo an ti ve bawk.

Blues tlarhnung lam pawh a phui lo a, league match hnuhnung pangaah goal an chhuah vek. Amaherawhchu Chelsea hi mahni muala khel tur an ni a, League Cup-ah ṭum hnih ngawt an chak avangin dah hniam theih an ni lo. Team ṭha pahnih an inkhel dawn a, inkhel hmuhnawm tak thlir tur a awm dawn e.

Zanin Inkhel Tur
Everton 06:00 PM Aston Villa
Brentford 08:30 PM Wolves
Leeds United 08:30 PM Newcastle United
Man United 08:30 PM West Ham United
Southampton 11:00 PM Manchester City

January 23, Pathianni
Arsenal 07:30 PM Burnley
Crystal Palace 07:30 PM Liverpool
Leicester City 07:30 PM Brighton & Hove
Chelsea 10:00 PM Tottenham Hotspur