Pacers lakah GSW an tlawm
Nimin zing NBA regular season inkhelah Golden State Warriors chu Indiana Pacers lakah 121-117 in an chak lo. GSW an chak loh lai hian an elpui Phoenix Suns erawhin Dallas Mavericks chu 109-101 a hnehin Western Conference hmahruaitu an nihna an sawhnghet thung.
Chase Center-a inkhelah team pahnih an inkhel tawk hle a, quarter li an khelh zawh hnuah chak zawk an awm loh avangin over time khelh a ngai hial. OT bikah Pacers lamin point 11 an neih laiin Golden State erawhin point sarih bak an nei ve thei lo.
Pacers tan point 27 neitu Chris Duarte bak mimala langsar fal an awm lo. Mahse, ani bakah hian player dang paruk ngawtin point 10 chuang an neih theih vek avangin team ṭha Golden State hneh nan a tawk.
Stephen Curry-a'n point 39 nei mah se GSW chak nan a tawk zo lo a, season kal laia a vawi 13 nan an tlawm. An elpui Suns aiin vawi liin an tlawm hnem ta zawk a, table hmahruaitu nih leh chu a harsa rih dawn.
NBA - Nimin Results
New Orleans Pelicans 102 - 91 New York Knicks
Phoenix Suns 109 - 101 Dallas Mavericks
Indiana Pacers 121 - 117 Golden State Warriors