Nagelsmann inngaihtuah ṭha dawn

Bayern Munich manager Julian Nagels­mann-a'n January transfer-ah player lakluh a tum loh thu sawi zet mah se a player pawimawh zinga mi Alphonso Davies leh Leon Goretzka te hun rei zawk an la chawlh dawn avangin a inngaihtuah ṭha dawn.

Bavarians hian Covid-19 leh inhliam vangin kumina an match hmasa berah Borussia Monchengladbach 2-1 in an hneh lo a, an player pawimawhte dam chho leh tawh mah se season ṭha taka zo turin an squad a chhah tawk em tih chhut a ngai.

Goretzka chu khup hliam vangin a chawl a, February-ah a rawn let theih a beiseiawm. Alphonso Davies pawh lung lam natna avangin April thla bawr velah a rawn kir theih chauh a rinawm.

Nagelsmann chuan, "January transfer-a player lakluh hi ka thlawp. Chutihrualin club sum dinhmun mila player lak erawh a ṭul ang," tiin a sawi.

Bayern hian Janaury 23, Pathianni zan hian Hertha Berlin an lenchilh dawn a, point thum hlawhchhuah ngei an tum ang.