Champion lai Barcelona an tla

Barcelona chu Athletic Bilbao hneh loin Copa del Rey last 16-ah an tla. Xavi naute hian hun tawp dawnah si phurh sut zo mah se, extra time-ah goal an chhuah leh avangin 3-2 a chak loin nomawi an kawl lai chu an hloh.

Last 16 inkhel dangah Real Madrid pawhin beisei an phak lo. Amaherawhchu, Carlo Ancelotti naute hian hun pangngaiah goal khung lo mah se 2-1 in Elche an luhchhuah thei tho a, harsa takin quarterfinal an lut thung.

Mangṭha Barca
Lionel Messi hun hnuhnung lam aṭang khan Barcelona hian ke a chhep fuh thei tawh lo. Messi chhuah hnuah buaina hi a fel mai lo a, a hma aiin an buai zual zawk tih chu khelmual chhung leh pawnah chiang takin a lang.

Manager thar Xavi-a'n beiseina siamsak mah se awlsam taka siamrem vek theih an ni lo. Season dang ang chu ni se Athletic Bilbao mualah pawh Barca zawk hi chak tura rinkai an ni ang, mahse season kal laiah chuan eng team pawh an hmachhawn tawk em em zel.

Minute hnihna lekah Iker Muniain hmangin Bilbao lamin goal an nei hmasa. Manchester City aṭanga an lak hlim Ferran Torres-a'n a club thar tana a goal hmasa ber hmangin a sut a, minute 86-naah mualneitu lamin Inigo Martinez hmangin hma an hruai nawn.

Hun rei lote inveng thei ni se Bilbao hi an tlang awlsam ang, mahse injury time minute thumnaah Pedri hmangin Catalan club lamin an chhang let thei hram a, extra time inhruai thleng thei mah se goal hmahruai khungtu Muniain bawkin penalty aṭangin chakna goal a khung.

Buaina a zual
An chak lo a, an champion mekna aṭangin Barcelona an tla - an buaina belhchhah turin Ansu Fati chu hliam vanga lak chhuah a ngai a, midfielder Pedri pawhin thlak a dil; hliam a neih avangin a khel tluan thei lo.

Fati hi Messi jersey hak hlui number 10 ha chhawngtu a ni a, a lakah beiseina a sang. Mahse, khup hliam vangin thla 10 a chawlh hnua lo kir leh chauh a ni a, tun ṭuma a malpui hliam hi a nat dan chiah hriat a la ni lo - khelmual a chhuahsan dawna a mittui chuan a rilru a pho lang.

Barcelona hi La Liga table-ah parukna an ni mek, champion beisei ngam chi a ni tawh lo. Cham­pions League last 16 an luh phak loh avangin tun season bika an nomawi beisei theih awmchhun chu Europa League chauh a ni. Hliam vanga an buaina a la fel dawn lo tih a chiang bawk.

Xavi chuan, "Duhthlan tur dang kan nei lo. Barcelona din thar leh tura ruahmanna kan neih lai hi beiseina nen kan kalpui zel ang," tiin player a nih laia ropuina a lo chanpui tawh Barcelona chu din thar leh theih a la beisei.

Real an chak
Real Madrid pawhin Elce hneh turin extra time hial an mamawh. Elche lamin goal an nei hmasa, Gonzalo Verdu goal khung chu tun hnaia khel tam lo Isco leh Eden Hazard te hmangin an sut a, team ṭha zawk hi 2-1 in an chak.

Ancelotti chuan, "Isco leh Hazard te khelh danin min ti lawm, khelmual chhunga hun tam zawk hman an phu tih a takin an lantir a ni," tiin a player pahnih khelh danah a lawm thu a sawi a, season chawhnu lamah hun a pe hnem hret a nih pawhin a mak lo ang.

Real Madrid leh Bilbao hma hian Mallorca, Cadiz, Rayo Vallecano, Valencia, Real Betis leh Real Sociedad te chuan quarterfinal an lo lut tawh. Team la dam zingah Real hi rinkai ber an ni tawh a, kum 2014 hnua a vawi khat nan an champion leh theihna kawng a inhawng zau.

Italian manager Ancelotti naute hian La Liga lamah fal takin hma an hruai mek bawk a, nomawi pakhat aia tam an chawi dawn niin a lang. Pathianni zan dar 8:45-ah Elche nen bawk hian league match an khel leh ang.