AFCON ; A thiam 16-ah champion lai Algeria an tel lo!

African Cup of Nations group stage chu khelh zawh a ni ta a, last 16 lut zingah champion lai Algeria an tel lo. Riyad Mahrez telna Algeria hian group match hnuhnung berah Ivory Coast 3-1 ngawtin an hneh lo a, group mawngphahah an awm.

AFCON last 16 hi January 23, Pathianni aṭangin khelh ṭan a ni dawn a, zan 9:30-ah Burkina Faso leh Gabon te an inkhel ang a, zan lai dar 12:30-ah Nigeria leh Tunisia te an inkhel leh ang.

Beisei pha lo Algeria
Kum 2019 khan Egypt-ah AFCON khelh a ni a, final-ah Algeria-in Senegal hnehin nomawi an chawi. Tun ṭuma inelna Cameroon-a neihah pawh hian Algeria hi champion rinkai an ni phak a, amaherawhchu inelna ṭantirh aṭangin beisei ang result an hlawh chhuak lo.

Algeria hian an match hmasa berah an group-a team nem bera ngaih Sierra Leone lakah goal an khung thei lo a, 0-0 in an inhnehtawk. Djamel Belmadi hnuaia khel Algeria-in an match hnihnaah Equatorial Guinea an hmachawn a, goal an khung an la khung theih loh bakah goal an chhuah avangin 1-0 in an chak lo.

Champion lai Algeria tan match hnu­hnung berah team ṭha bera ngaih Ivory Coast an hmachhawn a, chak ngei an mamawh. Ningani zan inkhelah Elephants an chungnung a, first half-ah Franke Kessie leh Ibrahim Sangare ten an khung bakah second half-ah Nicolas Pepe-a'n a khung belh.

Ivory Coast-in 3-0 a hma an hruai tawh hnnuah Manchester City midfiel­der Riyad Mahrez-a'n Algeria tan penalty a hlah a, an vanneih ṭum a ni lo. Minute 73-naah Sofiane Bendebka-a'n goal a khung a, tun inelnaa Algeria goal khung awmchhun niin result erawh a ti danglam lo.

Algeria hi kum 1990 khan AFCON-ah an vawi khat nan an champion a, kum 1992-ah champion lai nichungin inelna hmachhawnin Ivory Coast lakah 3-0 in an tlawm a, group stage-ah an tla. Tun ṭum inelnaa thil thleng leh kum 30 liam taa thil thleng hi a inang hle.

Team ṭha an tling
Champion lai Algeria-in beisei pha lo a, hming langsar zinga mi Ghana an tla bawk. Chutihrualin team ṭha dang erawhin group stage an paltlangah a ngaih theih. Inelna thlengtu Cameroon an group-ah pakhatna an ni a, Sadio Mane telna Senegal pawh an group-ah an che ṭha ber.

Mohamed Salah telna Egypt-in group match hmasa berah Nigeria hneh lo mah se Sudan leh Guinea-Bissau te hnehin an tling a, chutihrualin an group hmahruaitu erawh an khingpuite hneh vektu Nigeria an ni. Mali pawhin Group F hmahruaitu ni turin Mauritania 2-0 in an hneh a, Newcastle defender hlui Massadio Haidara leh Ibrahima Kone ten goal an khung.

Last 16 chu
Knockout stage chinah hian minute 90 chhunga an inhnehtawk a nih chuan extra time khelh tur a ni a, an la inhnehtawk fo a nih chuan penalty shootout hmangin chak zawk an zawng ang. Last 16 match hmasa berah Burkina Faso-in Gabon an hmachhawn dawn. Gabon hian an player chhuanvawr Pierre-Emerick Aubameyang chu Covid-19 vangin an chhawr thei lo.

Nigeria hian tun hma angin player lar kawl tam tawk lo mah se Europe club ṭha player an la kawl nual. Premier League-a khel Kelechi Iheanacho, Wilfred Ndidi, Alex Iwobi, William Troost-Ekong leh Frank Onyeka te an awm a, team tan ṭhatpui tham an ni. Eagles hian Pathianni zanah Tunisia an hmachhawn dawn a, quarterfinal an thleng lo a nih chuan upset-ah a chhiar theih ang.