MBA Championship nei dawn

Mizorama badminton inelna lian ber leh ngaihhlut hlawh ber, ranking point nei sang ber ni bawk Mizoram Badminton Association Official Championship Tournament 2022 chu kar leh chhung hian khelh a ni dawn.

Ramhlun Indoor Stadium leh Bawngkawn YMA Hall-a neih tur tournament-ah hian, under 13 aṭanga senior inkar category hrang hrang 19 zetah inelna hi neih a ni ang.

Tournament-ah hian match 370 vel awm tura beisei a ni a, semifinal aṭangin Zonet leh LPS-ah live a pekchhuah a ni ang. A tir aṭangin YouTube lamah chuan live a pek chhuah nghal tum a ni bawk. Mizoram sorkarin SOP a duante uluk tak leh khauh taka kalpui a ni dawn a ni.

He tournament lo awm turah hian men's singles-ah Samuel Lalnunmawia, Mizoram Police Badminton Club chu seeded pakhatna a ni a, women's singles-ah Lalrinhlui, Ralte Villa Badminton Club chu seeded pakhatna a ni thung.