Mourinho enkawl Roma an chak

Jose Mourinho-a'n tun hnaiah a naute khelh dan a duhkhawp loh thu a sawi fo a, tunah erawh hmasawnna hmuh tur a awm leh ta. Ningani zan khan AS Roma chuan Lecce 3-1 a hnehin Coppa Italia quarter­final an inpet kai.

Stadio Olimpico-a inkhelah mikhual Leece lamin Arturo Calabresi hmangin goal an nei hmasa, mahse mualneitu lamin Marash Kumbull hmanga an sut hnuah Tammy Abraham leh Eldor Shomurdov ten khung belhin an chak nuamsa.

Mourinho naute hian an match lehpekah chuan Inter Milan an hmachhawn dawn. Portuguese manager hian tun hma lama treble champion a nih pui tawh Inter hneh a tum dawn tihna a ni a, thawnthu hlui an sawi nawn leh ṭhin ang.

San Siro lama a kir lehna tur zawhna chhangin Mourinho chuan, "Kan hmabakah Inter an awm dawn, taksa bakah rilru lam thlenga inbuatsaih a ngai dawn, chutih rualin a lunglen thlak zawnga thil tih kual vek erawh ka mizia a ni lem lo.

"Tunah chuan Roma mana­ger ka ni a, Rome khawpui club tana theihtawp chhuah hi ka hna a ni. Cup a ni emaw, league lam pawh ni se kan hma a tih tur awm apiang chu a indawtin theih tawpin kan bei chhunzawm zel ang," tiin a sawi.

Roma hian Pathianni zan dar 10:30-ah Serie A match khel turin Empoli an lenchilh chhunzawm leh nghal ang.