Barcelona an buai, Dembele a ṭawng chhuak

France international Ousmane Dembele chuan Barcelona thanga inawhtir a tum loh thu a sawi a, Catalan club buaina hi khelmual chhung leh pawnah a punlun zel. Xavi hote hian January 23, Pathianni zan dar 1:30 hian Alaves an lenchilh dawn a, season thara Champions League khel turin point thum hlawhchhuah an mamawh takzet.

Barcelona director of football Mateu Alemany chuan, "Dembele-a'n Barcelona tana khelh chhunzawm a duh lo tih a chiang tawh. Kan hmachhawpa tel hi a duh lo. Dembele hi chhuak vat turin kan hrilh a, January 31 hmaa ngeia hralh theih kan beisei," tiin Dembele chungchang a sawi.

Kum 24 mi Dembele hi Spanish Super Cup semi­final-a Real Madrid an hneh loh ṭumin a khel tluan a, Copa del Rey-a Athletic Bilbao an hneh loh ṭumah erawh mimal thil avangin squad-ah a tel lo.

French winger Dem­bele chuan, "Ka nih lohna angin min puh a, ka nihna miah lo angin ka chanchin an sawi. Club tan ka theihna zawng zawng ka hlan a, coach tana chhawr theih turin ka awm. Ka khelhpui leh fan-te tan theihtawp ka chhuah zel ang. Mi bum hmang ka ni lo a, min tih mualpho tumte laka tlawm mai chi ka ni lo," tiin a insawithiam thung.

Kum 2017 khan Barce­lona-in Dembele hi pound maktaduai 135-in Borussia Dortmund aṭangin an lalut a, tun season tawpah a contract a zo dawn. Dembele hian contract thar a la ziak duh lo a, nipui bazarah man nei loa a chhuah theih tawh avangin Catalan club hian January thlaa hralh an tum.

Barca hi an sum din­hmun a ṭhat loh avangin player-te hlawh an pe tam thei lo a, tuna a lan dan chuan Dembele hian ama hamṭhatna umin nipui bazarah a chhuah a rinawm.