Arsenal hnehin Liverpool an tlang
Ningani zan khan Diogo Jota goal hnih hmangin Liverpool chuan Arsenal khelmual Emirates Stadium 2-0 in an luhchhuah a, Carabao Cup semifinal first leg-ah goal a luh loh avangin Reds hi si hnih faiin an tlang. Jurgen Klopp-a hote hian League Cup final an lut a, kum ruk hnua a vawi khat nan Wembley Stadium-ah final an khel dawn.
League Cup final hi February 27, Inrinniah khelh a ni dawn, semifinal hmasa lama Tottenham hnehtu Chelsea nen nomawi an inchuh ang. Tun laiah nomawi chawi a harsat tawh a vangin team pahnih hian thapui an thawh ang.
Boruak hmasa chu
A tira ruahman dan chuan first leg kha Emirates Stadium-a khelh tura tih a ni. Mahse, Liverpool lamin Covid-19 kai an ngah chu chhuanlama hmangin inkhelh hun sawn hlat an dil a, an dil ang hian phalsak an ni.
Anfield-ah first leg an khelh a ngaih phah, hei chu Gunners tan thil ṭha zawk a la ni thei. Amaherawhchu, hri leng kai nia an ngaih Reds player tam zawk chuan an kai leh lo tih hmuh chhuah a ni leh hnuhnawh a, hun an ruatsa erawh tih danglam theih a ni tawh lo.
Team pahnihin player ṭhahem tak an chan ve ve. Africa Cup of Nations khelh vang bakah hliam leh hri leng vanga khel thei lo an tam, an intawn hmasak leh hnuhnungah hian an player chhawr theih zinga a ṭha ber an chhawp chhuak.
Jota goal hnih
Mohamed Salah leh Sadio Mane te tel loin first leg-ah goal an khung lo a, player 10 a hun rei tak khel Gunners laka goal an khung loh avangin Jurgen Klopp-a nauten sawisel an hlawh, second leg-ah erawh boruak a danglam.
Alexandre Lacazette-a'n freekick aṭanga woodwork a tih per hnu, minute 19-na lekah Jota hian Arsenal keeper Aaron Ramsdale dan theih lohin a khung. Second half-ah Laca hian sut theihna remchang ṭha tak nei mah se a hlah nawn.
Hun tawp dawn hnaiah Trent Alexander-Arnold ball pek dawngtu Jota bawkin season kal laia a goal 14-na a khung, a goal hmasa pawh Arnold siamsak tho a ni; kum 2016 hnua a vawi khat nan Reds chu League Cup final a hruai thleng a ni.
Klopp a lawm
A naute khelh danah Liverpool manager a lawm a, a bik takin Jota chet dan chuan a lung a ti awi hle. Jurgen Klopp chuan, "Goal ṭha tak pahnih kan khung, a khungtu Diogo Jota a che ropui takzet. Kan hnena a lo kal aṭangin thil ropui tak tak a ti ṭhin.
"Tun hma pawhin player ṭha tak a ni ṭhin a, tunah chuan world class striker a ni tawh. Theihna a neih san bakah a rilru put hmang a dik avanga la kan ni kan beiseina a ni thlawn lo," tiin goal hnih khungtu Jota a fak nasa hle.
Liverpool hian Pathianni zanah Premier League an khel leh nghal dawn, khualmualah Crystal Palace an lenchilh ang - league hmahruaitu Manchester City nen an inkar zau deuh tawh mah se tha thlah a la rem chuang lo ang.
Arsenal an tla
Emirates Stadium-ah ṭhutna ruak hmuh tur a tam a, hei hian fans lam dinhmun a hrilhfiah. League Cup aṭanga an tlak hma hian FA Cup aṭangin an tla tawh bawk a, tun season atana beisei an neih san theih chu Premier League-a palina nih phak a ni ang.
Arteta-a'n rawlthar rual a ring ngam ṭhin a, an khelh fuh nih chuan hmuhnawm tak an ni. Mahse, inelna sang leh boruak khelh tel a ngaih tel tawhna chinah chuan player leh manager tawnhriat nei hnem ṭangkaina a lang leh ṭhin - hei hi Gunners tlak chham a ni thung.
Pathianni zan dar 7:30-ah Burnley an mikhual zui dawn, player ṭha ṭhenkhat awm lo mah se chak ngei an mamawh avangin thapui an thawh a ngai dawn. Result ṭha lo an nei zui a nih chuan a sang zual pali zinga tel phak pawh a harsa tawh dawn.