Mizoram Premier League ṭan a ni dawn ta ; Chhinga Veng hmaah kai thar Chawnpui
McDowell's No 1 Soda Mizoram Premier League Season 7 chu vawiin aṭangin khelh ṭan a ni dawn. Tualchhung football inelna sang nomawi zawng zawng kawltu Chhinga Veng leh kai thar Chawnpui FC ten chawhnu dar 2:00-ah match hmasa ber an khel ang.
Intawnna hmasa
Kumin I Day Football group match hnuhnung berah Chhinga Veng leh Chawnpui FC an inkhel a, champion lai Chhingcows hi MS Dawngliana goal hmangin 1-0 in an chak ṭawk.
Hemi ṭum hian Chawnpui FC tan knockout stage lut turin chak ngei a ṭul a, minute 90 chhung defensive game khelh ngam a ni lo. Tun ṭumah erawh Chawnpui hi point khatah pawh an lungawi dawn a, Chhinga Veng tan chetsual theihna a ni ang.
Coach thar nen
Chawnpui FC hi MPL ṭan hmain AFC B Licence nei coach Lalremtluanga'n an enkawl a, an inbiakrem hnuah inṭhenin an veng mi Laldinthara chu coach atan an hmang.
AIFF D Licence nei coach Thara hian assistant coach hna hun rei tak a chelh tawh a, Gosen Lalrammawia hoa MPL an inpetling ṭum pawhin assistant coach hna hi a chelh a ni.
Chawnpui manager H. Lalzawmliana chuan, "Thara hian club chhung a hrechiang a, RT-a chhuah hnuah Mizoram coach langsar dang kan chan tak loah chuan kan club tan chuan ani hi kan duh ber. Team boruak a ṭha em em a, chu chuan beiseina min neihtir a ni," tiin Vanglaini a hrilh.
Beiseina chu
Chawnpui hi MPL club thar ni mah se Mizorama football inelna sang bera tawnhriat nei tawh an kawl nual a, team ṭha ber chu ni lo mah se champion rinkai tana harsatna thlen theitu tur a ni.
Hualngohmun tlangval Vanlalthanga'n a club hlui Chhinga Veng a hmachhawn dawn a, Thanga ball pet thiamna hi vawiiin hian Chawnpui tan a pawimawh dawn. MPL an tlin theihna tura goal khungtu David Laltlansanga hi veng neitu a ni a, MPL khelh hmaa MFA Futsal League-a a chet ṭhat bawk avangin Avida hi a pawimawh ang.
Chhinga Veng hi team ṭha zawk tur an nih avangin tlarhnung lam player - goalkeeper Lalmalsawma Hmar, Reitlang FC defender hlui Lalthlamuana leh an intawn hnuhnung bera man of the match Lalruatfela te an pawimawh ang.
En man leh Ṭhutna
MPL inkhel en man hi Rs 30 a ni.
School naupang uniform ha leh kum 65 chung lam tan a thlawnin a en theih.
Tlai dar 2:00
Chhinga Veng : K. Kawla Stand leh S. Malsawmtluanga Stand
Chawnpui : Zomuanthanga Stand leh Zohminga Zote Stand
Zan dar 7:00
Mizoram Police : K. Kawla Stand leh S. Malsawmtluanga Stand
Bethlehem VT : Zomuanthanga Stand leh Zohminga Zote Stand