Real tan Bale a vul zel

Gareth Bale-a'n Real Madrid tan innghahna a tling tawk tih a pholang nawn zel a, Girona lakah European champion hi 4-1 ngawtin hnehna a chanpui - goal khat a khung.

Real Madrid tan Karim Ben­zema chuan goal hnih khungin Sergio Ramos chuan penalty hmangin a chhuih lut ve bawk a, Real hian vawi hnih ngawt penalty an hlawh chhuak.

Spanish La Liga-a inel ber tura ngaih Real Madrid leh Bar­celona te vawi hnih ve ve in­lan tawhin an la chak ve ve a, Atletico Madrid-in vawi hnih khelh­ah point li an nei tawh thung.

Hetihlai hian Valencia chuan an match hmasa berah Atletico Madrid chelh thei mah se team 'nem' zawka ngaih Espanyol lakah an tlawm a, 2-0 in an chak lo.

Rin loh lam

Girona khelmuala inkhelah Real tan harsatna awm tura ngaih a ni lo a, mahse rin loh takin Madrid khaw club hian minute 16-na lekah goal an chhuah. Borja Garcia chuan yard 12 vel aṭangin ṭha zetin a pet lut.

Mualneitu team goal khung danah Real tlarhnung chu mawhphurtu an ni a, kum 27 mi midfielder hi hmun awl an siam sak hnem mah mah a, thla hmasa lawka India rama pre-season tour-a Girona tana rawn zin Garcia hian tibuaitu nei loin a hun ṭha neih goal-ah a chantir.

Kerala Blasters laka 6-0 a chak tawh team hi an hlim chhung erawh a rei lo. Minute 39-naah Real-in penalty an hlawh chhuak a, captain Sergio Ramos chuan narsatna nei loin a pet lut.

Goal dang lut loin chawlh­lawk hman a ni a, team pahnih din­hmun chu 1-1 a ni. Season hma­saa Real an mikhual ṭumin Girona hian 2-1 in hnehna an lo chang tawh a, Real fan-ten hah­damin chawlhlawk an hmang lo.

Real chu le...

Second half ṭan a ni a, Real vanneih a kaltluang. Minute 52-naah a vawi hnih nan penalty an hlawh chhuak a, season hmasaa sawisel hlawh tak Karim Benzema rawn pen chhuakin goal-ah a chantir.

Girona-in Real lakah si an phur a, 'comeback' a harsa tawh dawn tih a chiang - Real an phur tulh tulh bawk. Benzema goal khung aṭanga minute sarihnaah Bale a inlar ve leh a, Welsh forward hian Cristiano Ronaldo an mamawh lo tih pholan nan an goal thumna a khung.

Minute 80-na a ni a, Real-in an la duhtawk lo. Karim Benzema chuan a goal hnihna ni turin a hun ṭha neih chu goal-ah a chantir leh a, first half-a inhnehtawk team hi Real-in second half-ah goal thum ngawt an khung avangin 4-1 in an chak.

Real hian season ṭan nana an match hmasa ber UEFA Super Cup-ah Atletico Madrid an hneh lo a, Ronaldo leh Zinedine Zidane-te hming a ri ring hman viau. Tunah erawh Julen Lopetegui hoin league match hnihah hnehna an chang a, an lung a leng rih lo hle!

BBC lo deuh..

Bale, Benzema leh Cristiano Ronaldo inkawp kha BBC tia hminglem pek an ni ṭhin a, khawvela tlarhma inkawpa hlauh­awm ber pawl an ni ṭhin. Mahse, season hmasaah Bale-a'n hmun a chang tam lo a, Benzema a 'form' lo bawk a, BBC hming lam rik a ni meuh lo.

Nipui transfer-ah Ronaldo a chhuak a, engtikahmah BBC kan hmuh leh a rinawm tawh lo. Mahse, Real coach thar Lopetegui-a'n tlarhma 'thar' Real player awmsa hmangin a din a, Benzema, Bale leh Marco Asensio te a inkawp tir.

Tun thleng chuan Spanish coach hian a thutlukna hi a la vanneih pui rih a, tlarhmaah an inkawp fuh hlawm hle. Bale-a'n goal a khung bakah assist a nei bawk a, a goal siamsak hi Benzema a ni. Kum 30 mi Benzema hian season hmasaah match 47 khelin goal 12 chiah a khung a, tun season-ah erawh match thum khelin goal thum a khung tling ta.

Marco Asensio hming lam hmaih a thiang lo. Kum 22 mi attacking midfielder hian Girona lakah goal khung lo mah se penalty pahnih kha a hlawhchhuah ve ve a ni a, Benzema leh Bale te nen an in man hle - an la hmuhnawm dawn chauh ang.