Mizoramin Puducherry an sawp

71st Junior National Basketball Championship 2022-ah Mizoram chuan nimin khan Puducherry chu 88-38 in an sawp a, match hmasa berah Andhra Pradesh 69-63 in an hneh tawh bawk.

Basketball Federation of India (BFI) buatsaih inelna hi Indore, Madhya Pradesh-ah neih a ni a, nimin inkhelah hian first quarter-ah Puducherry-in Mizoram el tawkin 11-14 chauhin pha lo mah se quarter tinah Mizoram an chungnung chhunzawm.

Mizoram hi second quarter (17-12), third quarter (26-13) leh fourth quarter (31-2) ah te an chungnung vek a, quarter tawp berah phei chuan an falna hi 29 points a ni.

Vawiin chawhma dar 11:00 hian Mizoramin Bihar an hmachhawn dawn. Bihar hian Puducherry an hneh tawh loh avangin Mizoram tan an group-a pakhatna nih hi a har lo ang.

Mizoram team enkawltute hi Michael Zohmingsanga, manager (Khatla), Vanlalnunsanga, coach (Khatla East) leh Ricky Lallawmkima, assistant coach (Ramthar Veng) te an ni.