Premier League inkhel sawn leh tawh

Pathianni zan dar 7:30-a Southampton-in Newcastle United an mikhual tur chu Magpies squad-ah Covid-19 kai an awm thar zel avangin sawn a ni leh ta a, Ningani zan khan Everton leh Magpies inkhel tur chu ṭhulh a lo ni tawh bawk.

Premier League danah outfield player 13 leh goalkeeper pakhat an awm chuan inkhel kaltlangpui tur a ni a, mahse, Magpies hian heti zat player an neih tlin rih loh avangin an inkhel thei lo - Premier League chuan an match sawn tura an dilna chu an pawmsak a ni.

December thlatir aṭang khan Covid-19 vangin Premier League match 17 chu sawn a lo ni tawh a, Liverpool manager Jurgen Klopp pawhin an match an kaltlangpui theih dawn leh dawn lohah a chian loh thu a sawi.

Klopp chuan, "Player zingah hripui kai thar pathum an awm a, staff-ah pawh an awm nual. Game sawn ngai khawp dinhmunah chuan kan la ding lo. Mahse, ni tinin hri kai thar a awm zel a, ṭhum vawr ang chauh a ni - engmah sawi theih a ni lo," a ti a, an dinhmun a ṭhat loh thu a sawi.

Zanina Leicester City leh Norwich City inkhel tur chu Norwich squad-ah hripui kai an tam avangin sawn a lo ni tawh bawk. 

Zanin Inkhel Tur
Arsenal 6:00 PM Manchester City
Watford 8:30 PM Tottenham Hotspur
Crystal Palace 11:00 PM West Ham United