Lukaku thusawi a ṭul lo - Tuchel

Chelsea manager Thomas Tuchel chuan tun hnaia a striker Romelu Lukaku-a'n Inter Milan-a kir leh a la beisei thu a sawi chu thil ṭul lo a nih thu a sawi a, "Kan mamawh loh bengchheng a siam mai mai a ni," a ti.

Kum 28 mi Lukaku hi kar engemaw liam taah khan Sky Sport Italia chuan an kawm a, mahse, he an inkawmna hi Ningani khan tihchhuah a ni chauh - he interview-ah hian Chelsea-a a hlim loh thu a sawi.

Lukaku chuan, "Tuna ka dinhmunah hian ka lawm lo a, mahse, lawm loh hi thil awm lo pawh a ni lo. Beidawn erawh ka tum lo - nasa taka thawk ṭhin ka ni tlat," a ti.

Belgian striker hian August khan Blues player man to ber ni turin Chelsea hi pound maktaduai 97.5-in a zawm a, match 18 a khelhsakah goal sarih a khung tawh - a man zat nen a inrem lo.

Hei chauh a ni lo - Lukaku hi hliam leh dam lohnain a tlakbuak a, a dam ṭhat pawha hmun pawimawh chan loh a nei fo bawk.

Lukaku chuan, "Ka thinlung takin Inter-a kir leh beiseina ka nei - ka career tawp lamah ni loin, ka vanglai ngeia nomawi ka chawipui leh theih nan kir leh ka duh a ni," a ti a, Chelsea fans tan ngaihthlak a nuam lo ang.

Tuchel chuan, "Lukaku thusawiah hian ka lawm lo. Mahse, a sawi tum tak aia hluara thil sawi awl tak a ni a, sawi vak pawh ka tum chuang lo. A nihna takah chuan a thil sawi hian kan mamawh loh bengchheng min siamsak a, rilru ding taka kal kan mamawhna kawngah min pui lo hle a ni.

"Niminah khan Lukaku dinhmun min zawt ula, a hlim thu ka sawi ang. A hlim viauah ka lo ngai a, chuvang chuan a thusawi hian min barakhaih a ni. Ni tina a hnathawh dan leh a beih rim dante ka thlir hian a mak a ni," a ti.

German coach chuan Lukaku a titipui tur thu a sawi a, tun hnaia result nei ṭha thei lo Chelsea-in khelmual pawnah pawh buaina an neih belh - Pathianni zan dar 10:00-ah Liverpool an mikhual dawn a, Tuchel-a sawi ang ngeiin Blues-in buaina an mamawh loh lai tak a ni.