India hnehin Ireland an tlang

Women's Hockey World Cup 2018 khelh mekah India nula ten chak ni hmel an la hmu thei rih lo, a tira rinkai ni phak lo Ireland erawhin match hnih an khelh tawhah point ruk an hmuh avangin Pool B hmahruaitu an ni chiang tawh a, quarterfinal an khel dawn.

Ningani zan Lee Valley Hockey Center, London-a inkhelah Ireland lamin minute 13-na lekah penalty corner an hmuh chhawr ṭangkaiin Anna O’Flanagan hmangin goal an khung a, quarter hmasa bera an goal khat neih hi an hum tluan theih avangin hnehna chan nan a tawk.

Ireland an tlo
Inelna neih ṭan hma khan Ireland hi world ranking-ah 16-na an ni a, an pool a ram dang pathum England (2), United States (7) leh India (10) lakah chuan ruh no deuh ber tura ngaih an ni.

Mahse, Irish team hian inelna tak an hmachhawn hnuah an khel ṭha thei hle. An match hmasa zawkah Deirdre Duke goal hnih leh Shirley McCay goal khat hmangin US 3-1 in an barakhaih tawh bawk a ni–match hnuhnung bera England an hmachhawn hunah hahdam takin an khel thei ang.

India lakah hnehna an chan leh avangin Ireland hi tun World Cup bika quarterfinal lut hmasa ber an ni a, hmeichhe hockey inelna lianah hian a thiam pariat zinga inhlangkai thei tawh ram zingah ranking hniam pahnihna an ni hial bawk.

Tlarhma bil
Goal an chhuah hma avangin India tan point hmu turin a chhanletna neih ngei a ngai, quarter hnihna aṭangin na takin an nawr a, hun ṭha pawh an insiam hnem malh malh hle–mahse Ireland shot stopper Ayeisha McFerran chet ṭhat ṭum an tawng a, an tum a hlawhtling thei lo.

Chawlhlawk hnuah pawh India bawkin inkhel an thunun chhunzawm a, Asia champion hian penalty corner pawh an hmu nual. Ireland keeper kianga ding defender pali an chesual duh lo a, an goal hmaah an buai duh lo; quarter thumna zawh dawnah Nicola Evans chuan an goal hnihna a hlawh chhuak leh teuh hle zawk a ni.

Hun a tawp hnai, India tan goal khung ngei a ngai tawh. Captain Rani Rampal chuan D line chhungah fal takin ball a lalut a, amaherawhchu goalkeeper McFerran-i'n angle a khar thiam a, India thiampuinu ball vuak na zet chu a lo dan sak.

India tan Mizo nula Lalremsiami Hmar pawh khelmual chhungah a inlan leh a, Kolasib forward leh Rani an inkawp fuh teuh thei hle a, mahse inelna dang an hmachhawn ṭum angin an vannei thei lo–Siami hian World Cup goal hmasa ber khung turin a nghah leh rih a la ngai.

Hmabak
India hian July 29, Pathianni zan dar 9:30 hian an hnuaia awm USA nen an pool match hnuhnung ber an khel leh dawn a, ram pahnih hian point khat ve ve an nei mek; Pathianni zan vek hian tling chiang tawh Ireland leh pahnihna ni lai England an inhmachhawn bawk ang.

World Cup khel ram 16 hi pool paliah ṭhen hran an ni a, pool hmahruaitu ṭheuh hi quarterfinal atan an tling nghal–pahnihna leh pathumna ten playoff an khel a ngaih dawn thung. Ireland tih loh a dang pathum England, India leh US ten beisei an la nei thei vek.

India hian US lakah point an hlawh chhuak a nih chuan an tling thei dawn a, US tan erawh tlang tur chuan chak ngei a ngai thung. Tun dinhmunah India hi pathumna ni mek mak se, an match hnuhnung berah US an hneh a, inkhel dangah England an tlawm a nih chuan pahnihna pawh an la ni thei.

India Squad
Goalkeepers: Savita (vice capt), Rajani Etimarpu.
Defenders: Deep Grace Ekka, Sunita Lakra, Deepika,
Gurjit Kaur, Reena Khokhar.
Midfielders: Namita Toppo, Lilima Minz, Monika, Udita,
Nikki Pradhan, Neha Goyal.
Forwards: Rani Rampal (capt), Vandana Katariya,
Lalremsiami, Navneet Kaur, Navjot Kaur.
Thlirna Tawi
A hun  : July 21 – August 5
A hmun  : Lee Valley Hockey Centre, London
Teal tel zat  : 16
Pool A: China, Italy, Korea, Netherlands
Pool B: England, India, Ireland, USA
Pool C: Argentina, Germany, South Africa, Spain
Pool D: Australia, Belgium, Japan, New Zealand
India Results & Fixtures
July 21, Inrinni
India 1–1 England
IND : Neha Goyal 25'
ENG : 54'
July 26, Ningani
India 0–1 Ireland
July 29, Pathianni
India 9:30 USA