Messi vs Ronaldo aiah PSG vs Real Madrid!

Ninmin tlai khan Champions League last 16 intum tur pawh a ni a, Manchester United leh Paris St-Germain pawh fuh an nih avangin football khawvel titi a tling nghal - Cristiano Ronaldo leh Lionel Messi an intawng dawn tlat a!

Mahse, Champions League draw-a thil la thleng ngai lo thleng a awm a, tlai dar 4:30-a draw neihah tihsual a awm avangin nizan dar 7:30 khan draw neih ṭhat a ni - Messi leh Ronaldo an intawng nawn ta lo a, PSG leh Real Madrid an intawng dawn ta thung.

Thiil thlen dan Champions League danah group stage-a inhmachhawn tawh club-te chu last 16-ah a intum theih loh. Mahse, nimin tlaiah hian United leh Villarreal chu inhmachhawn tura pawh fuh an ni phawt a, pawh ṭhat leh a nih hnuah City leh Villarreal an pawt fuh ta thung.

Tihsual vawi hnihna a thleng leh - Atletico Madrid hmachhawn theih tur dahna bawmah United dah an ni lo a, Liverpool an awm thung. Reds hi Atletico nen group khat aṭanga last 16 lut an nih avangin an inhmachhawn thei lo hrim hrim a, Spanish champion hi Bayern Munich hmachhawn tura pawh fuh an ni zui.

Tichuan...
Atletico tan Bayern tum hi thil châkawm a ni lo a, tihsual vanga hmachhawn phei chu a lawmawm lo lehzual. UEFA nen inbiakna an nei nghal a, European football thuneitu sang ber hian an tihsual pawmin draw hi neih ṭhat turin an ti zui. UEFA chuan thuchhuah siamin technical thil vanga buaina chu thleng a nih thu leh, pawn lama an thawhpuite software aṭanga thil kal sual vanga chesual an nih thu an sawi a, an pawh ṭhat meuh chuan Atletico pawhin an duh an hmu - Manchester United an hmachhawn dawn.

Chelsea vanneihna
Champion lai Chelsea-in group stage-a pahnihna ni chungin last 16 an lut a, pakhatna zinga tum châkawm bera chhal ngam Lille an hmachhawn dawn - draw neih hmasak leh neih ṭhat hnuah French champion hi an chang ve ve!Draw hmasaa Red Bull Salzburg tum dawn vanga quarterfinal mitthla hman Liverpool-in Inter Milan an chan tak avangin a hma aiin hna a hautak dawn a, Manchester City-in Sporting Lisbon an chan avangin an sawisel lo ang.

PSG vs Real
Draw neih a nih hmasakin Real-in Benfi ca an chang a, draw neih ṭhat ngaihtuah a nih khan thil tihsual chu Real hmachhawn tur a chian hnua thleng chauh a nih avangin Real vs Benfi ca hmaa draw neihte chu draw ṭhat tur zinga telh lo turin an dil niin an sawi! Mahse, a vaiin draw neih ṭhat a ni a, Real-in Lionel Messi leh an club legend Sergio Ramos khelhna PSG an chang - an vanduai. Bayern pawhin Salzburg an chang a, Atletico ai chuan tum an chak ve tho ang.

A behbawm
Champions League last 16 fi rst leg hi February 15, 16, 22 leh 23-ah khelh a ni dawn a, second leg chu March 8, 9, 15 leh 16-ah khelh a ni thung dawn. Kumin fi nal hi May 28 khian St Petersburg, Russia-ah khelh a ni ang. Tun season-ah hian away goal rule chu thai bo a ni tawh a, hei vang hian minute 180 chhunga chak zawk an awm lo a nih chuan extra time khelh a ni ang a, hetah pawh chak zawk an la awm lo a nih chuan penalty hmanga chinfel tur a ni.

CHAMPIONS LEAGUE LAST-16 DRAW:
Red Bull Salzburg vs Bayern Munich
Sporting Lisbon vs Manchester City
Benfi ca vs Ajax
Chelsea vs Lille
Atletico Madrid vs Manchester United
Villarreal vs Juventus
Inter Milan vs Liverpool
PSG vs Real Madrid